Nunani Avannarlerni ministerit Kim Kielsenip ataatsimeeqatigai
- Nunat Avannaamioqatigiit eqqarsaatigalugit tassani qanimut suleqatigiinnissaq ingerlatiinnarneqassasoq oqariartuutigineqarpoq.
Naalakkersuisut siulittaasuat, Kim Kielsen taama oqarpoq.
Nunatta pisuussutaannik atorluaanerunissaq eqqartorneqartunut aamma ilaasoq, Kim Kielsen oqarpoq.
- Nunani Avannarlerni ministerit siunnersuisooqatigiivini danskit suli siulittaasuunerannut atatillugu eqqartukkatta ilagaat, issittumi pissutsit. Tamannalu eqqarsaatigalugu uangullu tamassumunnga sunniuteqarniarsaraagut. Tassa danskisut taallugu 'Det blå arktisk', tassa eqqartorneqarpoq. Tassani imartatsinni pisuussutinik atorluaanissaaq, ulluinnarni Nunatsinni suli atorneqanngitsut soorlu sulluit allallu pingaarnertut eqqartorneqarlutik, Naalakkersuisut siulittaasuat oqarpoq.
Puisit amiisa EU-mut tunisassiarineqartarnerisa EU-mi inatsisartunit inatsisiliuuteqqinneqarnera ministerit naapinneqanni aamma eqqartorneqartoq, Kim Kielsen oqarpoq.
- Tamanna pillugu ministerit oqaloqatigaagut qujanartumillu ministeriut ersarissumik tamanna pillugu ilalerpaatigut aamma oqarlutik suliaq tamanna annertunerusumik suli malersorneqartariaqartoq. Ministerillu oqarput tamanna pillugu aningaasanik tapersiisimallutik.
Naalakkersuisut siulittaasuata, Kim Kielsen tusagassiuutinut nalunaarummini ippassaq allappoq, Nunat Avannarliit nunarsuatsinni aningaasarissaarnerit akornanni normu 11-iunerat eqqarsaatigalugu, Nunat Avannarliit pitsaasumik suleqatiginissaat pingaaruteqartoq.
