Nunani avannarlerni atuisartut sullinneqaannassapput
Nunani avannarlerni atuisartut pillugit suleqatigiinneq ingerlaannassaaq, naak nunani avannarlerni siunnersuisoqatigiinni atuisartut pillugit aalajangersaasartut atorunnaarsinneqaraluartut.
Atuisartut pillugit suliassat nunat avannarliit ministeriisa aalajangersaasartuini assigiinngitsunut siammarterneqassapput.
Ministerit aalajangersaasartut ullumikkut 18-iupput, pilersaarutaavorlu aalajangersaasartut aqqaniliinnanngortinneqarnissaat.
Taamatut aalajangiineq nunani avannarlerni atuisartut siunnersuisoqatigiivinit arajutsisimaneqanngilaq.
Nunani avannarlerni ministerit Narsami ataatsimiilermata nunani pineqartuni atuisartut siunnersuisoqatigiit qisuariaateqarput.
- Atuisartut siunnersuisoqatigiivi annilaanngatissaqanngillat, Danmarkimi avatangiisinut ministeri, nunanut avannarlernut tunngasunut aamma ministeriusoq, Connie Hedegaard oqarpoq, nangillunilu:
- Paatsuuineruvoq oqassalluni nunani avannarlerni atuisartut pillugit suleqatigiinneq unitsinneqalersoq.
Atuisartulli pillugit aalajangersaasartut suliassaat aalajangersaasartunut allanut nuutsinneqaannarput, Connie Hedegaard oqarpoq.
Kalaallit Nunaanni atuisartut siunnersuisoqatigiivisa allattoqarfianni pisortap, Niels Peter Gundelachip, nuannaarutigaa atuisartut pillugit suleqatigiittoqaannassammat:
- Atuisartut pillugit suleqatiinnerup unitsinneqarnissaa annilaanngatigisimagaluarpara, nuannaaqaangali taamaattoqanngimmat. Suliassanik paarlatsitsineriinnaavoq, Niels Peter Gundelach oqarpoq.
