Kalaallit, island-imiut savalimmiormiullu katersuuffigisinnaasaannik Danmark-imi illoqarfimmi Odense-mi pilersitsiniartoqalerpoq, kalaallimmi maanna illuutaat maanna mikivallaalersimavoq.
-Assersuutigalugu naalagiaqatigeereernerit kingorna kalaallit illuutaanni kaffisoqatigiinnerni, inuiattut ullorsiornerni, saqqummersitsinerni atuartitsinernilu katersuuffipput ataatsimoorfigissallugu mikivallaarpoq, Odense-mi kalaallit illuutaanni pisortaq Kirsten Mærsk nassuiaavoq.
Initunerusumik katersuuttarfiittaarniarnertik, immamut isikkivilimmi, umiarsualivimmiluunniit inissinneqarsinnaanera, Naalakkersuisut siulittaasuata Hans Enoksen-ip pingasunngormat tikeraarnerani saqqummiuppaa.
Odense-mi kalaallit, island-imiut savalimmiormiullu 2.000-t pallillugit najugaqarput, tamarmillu inuunerminni pingaartitaat assigiillutik.
-Inuiaammi Atlantikup Avannaamiut ataatsimoorutigaat nerisatik – naak tipeqartaraluartut. Oqaluttuarisaanermi ataatsimooruteqarput, pinngitsoorsinnaanngilaallu immamut isikkiveqarnissaq, Kirsten Mærsk oqaluttuarpoq.
Piviusunngortinniagaq takorluugaannaagaluartoq Fynip Amtianit 170.000 kr.-nik pilersaarusiornermi atugassanik tapiissutisipput. Naalakkersuisut siulittaasuata pilersaarut soqutigaa, Odense-p borgmesteriata Jan Boye-ttaaq soorlu aamma soqutigigaa. Takorloorsinnaavaami Københavnimiittutut Illorsuaq Atlantikutut ittumik Odense-mi pilersitsisoqarnissaq.
Odense-p borgmesteriata Jan Boye-p pissusissamisoorsoraa Atlantikup avannaamiut Odensemi katersuuffeqalerpata; taamaalillutimmi kulturiminnik Odense-missaaq takutitsisinnaassammata.