Nunani allani tusagassiortut nunatsinnik soqutiginninnerujussuartik takutippaat
Kalaallit Nunaat ersarissumik ulluni makkunani maluginiarneqarpoq. Nunarpummi nunani tamalaani qulequtarineqarluni sapaatit-akunnerini qaammaatinilu kingullerni eqqartorneqangaatsiarpoq.
Nunaqavissunullu pingaartumik Nuummi illoqarfinnilu annerni tusagassiortorpassuit takussaasut arajutsisassaanngillat.
Trump Juniorip Nuummi januaarip aallartinnerani tikeraarneranit aallartippoq, ataataatalu Trumpip nunarput pillugu oqaaseqarnera, taamatuttaaq Inatsisartunut qinersinissaq pillugu soqutiginninneq annertunerulerpoq.
Tusagassiortut nunatsinnut tikittut ilagaat Jürgen von Heymann. Taanna Københavnimi inissisimalluni ulluinnarni tusagassiortutut imitsittartuuvoq, tyskit tv-qarfianni public service-medie, ZDF-imeersut assiliisartut suleqatigiit peqatigalugit februaarimi Nuummut Ilulissanullu angalapput.
- Trumpip oqaaseqaatigisai pillugit Tysklandimi aaqqissuisunit Kalaallit Nunaannut taperseerusulersinnissaa tassunga siunertaavoq, taanna KNR-mut oqarpoq.
Jürgen von Heymann Islandimi ukiuni arlalinni najugaqarnikuuvoq, Kalaallit Nunaannilu angalanikuulluni. Taamaalilluni Issittumi pissutsinik ilisimasaqarnini atorluarlugu ilaqutariit Trumpikkut nunatsinnut soqutiginninnerinnaat pinnagu nunarpulli aamma pillugu tyskit isiginnaartartuinut oqaluttuanik pilersitserusulluni nunatsinniippoq.
– Atuarfimmut pulaarpugut, kalaallit meerartaasa siunissaat pillugu atuarfimmi pisortaq oqaloqatigalugu. Qimmiitilinnut pulaarpugut, siunissamilu qimusseqarneq pillugu susoqarnissaa oqaloqatigisarput eqqarsaatersuuteqarpoq. Nuummilu ujarassiuut marluk, Ilisimatusarfimmi professori tyskiusoq oqaloqatigaavut, taakku saniatigut politikkerit arlallit ministererlu oqaloqatigalutigit.
Jürgen von Heymann oqarnera naapertorlugu, tyskit innuttaasui ataatsimut isigalugit nunarput pillugu ilisimasakipput. Taamaammat tyskinut isiginnaartartunut ilisimasaqarnerulersitsinissaq anguniarlugu paasiuminarsakkamik oqaluttuanik pilersitsinissani siunertaraa.
- Nuummut pilluni, inuiaat naapillugit qanoq innersoq minnerunngitsumillu Kalaallit Nunaanni aningaasaqarnikkut periarfissat oqaluttuarinissai pingaaruteqarput. Kalaallit Nunaat Danmarkimut soorunami aamma USA-mut sanilliullugit qanoq inissisimanersoq takutikkusullugu politikkikkut akerleriinnerit eqqartulaarnikuuagut, taanna oqarpoq.
Akunnittarfimmi pisortaq: Nunarput naliligassaanngitsumik nittarsaanneqarpoq
Nuummi akunnittarfiit anginersaanni Hotel Hans Egedimi, piffissami tassani unnuisoqannginnerpaaffissaaniittaraluartoq, nunanit allanit tikillutik unnuisut aatsaat taama amerlatigisut qaammatini kingullerni marlunni misigaat.
- Nunanit tamalaaneersorpassuarnik aviisiliortunik, tusagassiortunik tv-kkullu aallakaatitassiortunik taama amerlatigisunik akunnittarfimmi takunikuunngisaannarpugut. Nunarsuup ilarsuaniit tikerartuupput. Taamaammat tikittartutsinniit sungiusimasatsinniit allaanerulaarput, Hotel Hans Egede A/S-imi pisortaaneq Jørgen Bay-Kastrup oqarpoq.
Akunnittarfimmi unnuinernut pingaarnertut præsident Trumpip Kalaallit Nunaat aqulerusullugu nalunaarutaa tassani aamma pissutaavoq.
Læs ogsåTrump: USA vil investere milliarder i Grønland
Tamatuma saniatigut Trump Jr.-ip januaarimi ulluinnarlugu Nuummiinnermini akunnittarfimmut neriartornera pillugu tusagassiorfippassuit tusarniaallutik saaffiginnipput.
- Nunatta ilanngussorfigitillunilu oqallisaanerani peqataneq misigalugu soqutiginarlunilu nuannerneranik akisarpugut. Politikkikkut tusagassiutitigullu malunnaatilimmik ilisimaarilluarneqalersitsivoq. Oqaluttuarisaanermi Kalaallit Nunaata nunarsuup assingani allatorluinnaq inissinneqarpoq, Jørgen Bay-Kastrup oqarpoq.
Kalaallit Nunaannut piffissami kingullermi soqutiginninneq nalitoorujussuartut taassuma isigaa.
- Nammineq isummersortoqarsinnaavoq. Kisianni Trump Jr.-ip januaarimi Nuummi takoqqusaarnerani tusagassiutinit nuannarineqarnerulerniarnerinnaavoq, Kalaallit Nunaannut assigiinngitsorpassuartigut niuernermut pissanganartumik pingaartumik takornariaqarnikkut aamma ineriartornermik killeqanngitsumik naliligassaanngitsuuvoq, taanna oqarpoq.
Arlallit apeqqarissaarneqarnissamut piumanngitsut
Nunat allat tusagassiorfiinit soqutigineqarneq inuit ilaanit nuannarineqanngilaq.
Inoqatinut attaveqaatini inuit nuimanerusut arlallit pingaartumik kulturi pillugu oqallinnerni apeqqarissaarneqarnissanut arlalinnut piumanngillat. Taakkununnga suliani spiralilersuisoqarsimaneranik oqaaseqartartoq Naja Lyberth ilaavoq.
Spiralilersuisimanermi suliat oqallisigineqarneri Inatsisartunut qinersisoqarneranut sunniuteqarnissaa kissaatiginngikkini Facebookimut allappaa.
Inuilli allat aamma nunani allani oqaaserisimasat atornerlunneqarsinnaanerisa aarlerinaateqarnerat pissutigalugu piumasimanngillat.
Nunat allat Kalaallit Nunaannut soqutiginninnerat tammalertornavianngitsoq illuatungaanulli soqutigineqaleraluttuinnassasoq, tusagassiortoq Jürgen von Heymann oqarpoq.
- Kalaallit Nunaata ukkatarineqarsimanera inuit eqqaamassagaat isumaqarpunga. Danmarkimut atajunnaarnissaq pillugu soqutiginninneq tamaariartupallaleqqissinnaagunarpoq. Kisianni Kalaallit Nunaannik soqutiginnileraluttuinnartoqarnissaa, taannalu soqutiginninneq takornariaqarnermut atasuusoq isumaqarpunga, taanna oqarpoq.
Kalaallit Nunaannut pingaartumik politikkikkut soqutiginninneq qaffaserusaaginnassasoq taanna naliliivoq.
- Imaassinnaasoq, aalisarneq aamma aatsitassanik qaqutigoortunik Europamit soqutiginnittoqarnerattaaq pissutigalugu aamma EU-p tungaaninngaanniit ukkatarineqaqqilissasoq. Soqutiginninnerlu tamanna ilippaginnginneqassanngilaq, Júrgen von Heymann oqarpoq.
