Nunani allani pisut ilaat

Irakimi kisermaassilluni naalakkersuisuusimasup Saddam Husseinip, naalakkersuisuunermi nalaani iliuuserisarsimasani pissutigalugit toqumut pillagaasussanngortup toqumut eqqartuussaanini eqqartuussisunut suliassanngortitsissutigaa. Saddam novembarimi toqumut eqqaartuussaavoq, ilaatigut musliminik shiasiortunik 148-nik toqoraasimasutut pisuutinneqarami. Saddam-illu suliassanngortitsissutaa eqqartuussutinik suliassanngortitsinermut eqqartuussivimmit aalajangiiffigineqassaaq.

Kisermaassilluni nunamini naalakkersuisuusimasoq alla, tassalu Amerika kujallermi naalagaaffeeqqami Chilemi 1973-imiit 1990 tikillugu kisermaassilluni naalakkersuisuusimasoq maanna 91-inik ukioqartoq Augusto Pinochet uummalliulermat napparsimmavimmut unitsikkasuarneqarsimasoq, peruluttorlu tusarliunneqarpoq.

Danmarkimi atuarfeqarfimmik namminersortumik Tvindimik aallartitsisuusimasoq, akileraarutitigullu peqquserluuteqarnermut annertuumut akisussaasutut aggustimi eqqartuussaanermini pinngitsiititaasoq Mogens Amdi Petersen kangiani Singaporemiittoq ilisarineqarsimasoq DR tusarliussivoq. Amdi Petersen massakkut ujaarineqarpoq, eqqartuussinermi inernerusoq unnerluussisup ingerlateqqimmagu. Amdi Petersenimik Singaporemi ilisarinnittuuvoq ilinniartitsisoq danskiusoq, taassumalu politiit ilisimatissimavai.