Nunani allani angalatillutit mobilikkut akikinnerusumik internettersinnaalerputit
Aasaanerani sulinngiffeqarninni oqarasuaat angallattagaq atorniarukku, taava ilinnut nuannersumik nutaarsiassaqarpoq.
Juulip aallaqqaataa aallarnerfigalugu Kalaallit Nunaanni oqarasuaatinik angallattakkanik atuisutut nunani allani atuineq suli akikinnerulissaaq – tassa sianerfigitikkaangavit aamma allanut sianeraangavit, SMS-eruit imaluunniit mobilinternet atorukku.
Datanut akigitinneqartoq affaannanngussaaq
Akigitinneqartut appartinneqarnerat ingammik Nunanut Avannarlernut aamma Baltikumimut angalasunut malunnaateqassapput.
Sipaaruteqarfigineqarnerpaasussaq tassaavoq datanut akigitinneqartoq, taanna affaa sinnerlugu appassaaq MB-mut 3,35 koruuninit MB-mut 1,49 koruuninut. Sumiiffimmi tassani aammattaaq sipaarutissarpassuaqarpoq sianernermut aamma SMS-ernermut. Taakkunani akit 1,79 koruuninit 1,42 koruuninut minutsimut akikillissapput, tassa Kalaallit Nunaani atuisutut Kalaallit Nunaannut imaluunniit Nunani Avannarlerni aamma Baltikumimi normumut sianernermi.
Sianerfigitinnermi akigitinneqartoq minutsimut appassaaq 0,52 koruuninit 0,38 koruuninut, kiisalu SMS-imik nassiussineq 0,60-imit 0,45 koruuninut.
- Akigitinneqartut appartinnissaannut periarfissarsigatta assut nuannaarutigaarput. Kisianni sullitatta nunani allaniitillutik filminik aamma nipilersukkanik annertuumik aallernaveersaarnissartik eqqumaffigissavaat, tassami tamanna akisoorujussuanngorsinnaavoq, Frank Gabriel, TELE-POST-ip susassaqarfimmi tassani tuniniaanermut pisortaa oqarpoq.
Sullitanut TUSASS-imik atuisunut akigitinneqartut assingi sianernermut aamma SMS-inut atuupput kiisalu aasap ingerlanerani aammattaaq sullitanut taakkununnga Danmarkimi datanik atuisinnaaneq periarfissanngussaaq.
Akit paasiuminarnerusut
Siornatigut nunani allani sianernermut, SMS-ernermut aamma datanik atuinermut akigitinneqartunut nunani ataasiakkaani atuititsisutapeqqutaasaraluarput, taamaattumillu akit annertuumik allanngorarsinnaasarlutik.
Juunip 21-at aallarnerfigalugu nunarsuarmi akigitinneqartut arfineq pingasuinnarnut aggorneqalissapput. Taamaattumillu sullitanut akigitinneqartut takunissaat ajornannginnerulissaaq, tassami sumiinnertik apeqqutaatinnagu akigitinneqartup assigiinnissaa naatsorsuutigisinnaalerpaat.
