Nunani allamiut saarullinniarnissaat killilersimaaqquneqarpoq
Nunat allamiut sinerissap qanittuani saarullinnik aalisarniarlutik qinnuteqarniartut unitsinneqarlik, naalakkersuisunut ammasumik allagaqarlutik taamatut piumasaqartut tassaapput, KNAPK, Kalaallit Nunaanni Sulisitsisut Peqatigiiffiat aamma aalisariutaatillit Polar Seafood A/S.
Nunat allamiut aalisariutaat Kalaallit Nunaani pigineqartutut allassimallutik kujataani saarullinniarniarlutik qinnuteqarniarput, naalakkersuisunut ammasumik allakkami tamanna ilanngunneqarpoq.
KNAPK-p, Polar Seafoodip, Sulisitsisullu Peqatigiiffiata taamatut ineriartortoqarnera ernummatigaat. Saarulliit amerlasoorsuullutik nunatta sineriaanut uteqqinnerannik pinngortitaleriffiup siulittuutaa eqquutissappat raajat annertuumik ikileriarnissat naatsorsuutigineqarsinnaavoq. Pinngortitaleriffiup 2006imi allagaa aallaavigalugu saarulliit 1980-ikkut naajartulernerannitulli sukkasuumik amerliartulissappata raajat, raajarniat ullumikkut pisarisartagaasa amerlaqataannik saarulliit raajatortalissapput tassalu ukiut pingasut sisamat ingerlaneranni tonsit 130.000-it tamannalu raajaqassutsimut sunniuteqarnerluttussaavoq, pinnngortitaleriffik allappoq. Allatut oqaatigalugu nunat allamiut sinerissami saarulliniartalernissamik qinnuteqartut ikilisinneqarnisaannik naalakkersuisut innersuussiffigineqarput, KNAPKmi allaffimmi pisortaq John Biilmann radioaviisimut oqarpoq. Aalisagaqassassuseq ullumikkutut itsillugu uagut nammineq aalisarsinnaavagut, John Biilmann oqarpoq.
Nunat allamiut aalisagartassinneqartarnerisa killilersorneqarnissaat nakkutiginngikkutsigu raajarniutit qaqiinnarneqartalissapput, tamannalu ajuusaarnartorujussuussaaq.
KNAPK, Kalaallit Nunaani Sulisitsisut Peqatigiiffiat, Polar Seafoodilu avataasiorluni aalisarneq eqqarsaatigalugu, naalakkersuisunut kajumissaarutigaat akuleriinnik aalisarsinnaaneq oqaluusereqqullugu, raajarniat raajanik kilisannerinnarmik isumalluuteqarunnaarnissat eqqarsaatigalugu.
Ukiuni arlalinni atuuttunik aalisagartassiisoqartalernissaa kattuffiit naalakkersuisunut allagaqarnerminni siunnersuutigaat.
