Nunaminertamik qinnuteqartarneq ajornannginnerulissaaq
Sumiiffik nunaminertamik qinnuteqaatigisaq toqqaannartumik NunaGIS-ikkut nunap assinganut digitaliusumut titartarneqarsinnaalissaaq. Allatut oqaatigalugu nunaminertamik atugassinneqarfissatut kissaatigisaq pillugu eqqoqqissaanngitsumik nalunaarsuisarneq atorunnaassaaq.
Atortut digitaliusut atorlugit nunaminertamik atugassinneqarnissamik qinnuteqartarneq pisortani atortut digitaliusut atorlugit ingerlatsilernissamut siumut alloriarneruvoq. Periaatsip nutaap atulerneratigut nunaminertamik atugassinneqarnissamik qinnuteqartarneq innuttaasunut, kommuninut aamma Namminersorlutik Oqartussanut ajornannginnerulissaaq.
Atortulli digitaliusut atorlugit atsiorsinnaalernissap atorneqarsinnaalernissaata tungaanut qinnuteqaatit atsiorneqartarnerat ingerlaannarallassaaq. Taamaattumik qinnuteqarnissamut immersugassat naqitsillugit anillatsinnissaat, kommunimullu nassiunneqannginnerminni atsiorneqarnissaat suli pisariaqartussaavoq.
Kommunini sisamaasuni tamani qinnuteqarnissamut immersugassat immikkut naleqqussakkat pissarsiarineqarsinnaassapput. Aamma qinnuteqarnissamut immersugassanut linkit kommuunit sisamaasut nittartagaanni aaneqarsinnaassapput.