Innermik anitsisartup ujaraa karbonati Tikiusaami Qeqertaasamilu uuttortaanermi nassaarineqartoq aamma Maniitsup eqqaaniittoq REE-mik akoqarpoq, taannalu aatsitassaavoq qaqutigoortoq teknologimut mingutsitsinngitsumut atorneqartartoq.
- Kajungerisartulimmik uuttortaanerup karbonitteqarnera takutippaa, Nunaminerals fondsbørsenimut nalunaarummini allappoq.
Qulimiguullip martsimi aprilimilu 3.955 kilometerisut isorartutigisoq kajungerisartulimmik uuttortarpaa. Uuttortaanermi Nunamineralsip Tikiusaami misissuinissamut akuersissutaa tunngavigineqarpoq. Misissugassatut tigusat misissorneqarneri 2010-mi aggustimi naammassineqassangatinneqarput.
Kina ullumikkut REE-mik sanaartortuuvoq. Kina REE-mik atuinerpaavoq 2012-imiillu eqqussuisunngornissaa naatsorsuutigineqarluni, Nunaminerals fondsbørsenimut nalunaarumiini allappoq.
REE biilini innaallagissatortuni, qarasaasiat umeruaanni anorisaatinilu atorneqartarpoq.