NunaMineralsip Koreami aatsitassarsiutileqatigiiffissuaq isumaqatigiissuteqarfigaa
NunaMinerals tusagassiorfinnut nalunaaruteqarluni allappoq Koreamiut aatsitassarsiutileqatigiiffissuat KORES peqatigalugu misissuinissamik isumaqatigiissuteqarfigimallugu. Tamannalu Dubaimi ataatsimiinnermi pisimavoq.
Pilersaarutit malillugit Maniitsup eqqannguani Qeqeetaasami saffiugassanik qaqutigoortunik peqatigiillutik ujarlerniarput. Taamatut isumaqatigiissuteqarnermi KORES ujarlernermut aningaasartuuutinut 20 mio. kouunit missaannik aningaasaliissuteqarnermigut piginneqartaassutit 51 procentii pissarsiarissavai. Isumaqatigiissutilli ingerlanneqarnissaanut NunaMinerals aningaasaliissutissanik pisariaqartunik pissarsisinnaassanersoq apeqqutaassaaq.
Koreami suliffeqarfissuup misilittagartuup tumaasaneqarluartullu sivisoosuarmillu ingerlatsisimasup suleqatigisinnaanera nuannaarutigaarput, aamma pitsaalluinnartumik suleqatigaarput, Ole Christiansen Dubaimit taama oqaluttuarpoq.
Aammattaaq NunaMinerals suliniummik 2009-miilli ineriartortitsisimasoq oqaluttuaraa, 2011-milu sumiiffimmi pineqartumi pisuussutinik misissuilluni katillugit meterinik 2500-nik qillerisoqarsimasoq.
Ole Christiansen oqaaseqartissinnaasimanngilarput, aammalu suliniut qanoq annertutiginersoq nalunaarutimini allassimanngilaa, Koreamiulli suliniummut peqataalernerat annertuumik isumallulersitsisoq oqaatigaa.
- KORES-ip peqataanera saffiugassanik qaqutigoortunik annertuumik pitsaassusilinnik pisuussuteqarneranik takutitsivoq . Suleqatigilikkatta qanittumik suleqatigineratigut suliniummik ukiuni aggersuni iluatsilluartumik inerisaasinnaalluta qularutiginngilarput, Ole Christiansen taama oqarpoq.
