NunaMineralsip angusani naammagisimaarpai

Aatsitassarsioqatigiiffiup Nuna Mineralsip aktiat nutaat 650.000-it Fondsbørsenimut tuniniaraluaramigit ilimagisamit annikinnerusumik tunisaqarpoq, tassami 257.115-it, 112 milliuuni koruuninik nalillit kisiisa tunivai.
juunip 19-at 2008 06:41

Taamaakkaluartoq aatsitassarsiorfiup pisortaata Ole Christiansen isertitatik naammagisimaarpai.

- aktianik tuniniaagatta 112 mio. koruunit missaanni isertitsivugut, taakku ajorisassaanngillat kisianni neriuutigisimagaluarparput 200 mio. koruunit missaanni isertissallutigit, Ole Christiansen oqarpoq.

Taanna aperaarput arlaannik kukkussuteqarsimanersut.

- Kukkusoqanngilaq, periuseq nalunnginneqarluartoq atorparput taamaallaat eqqumiigilaarsimavarput aktiat taamarujussuaq qaffasitsigisumik niuerutigineqarsimammata, uagullu ataatsikkut tuniniaanitsinni appasinnerusumik akeqartitsilluta tuniniaagaluartugut, oqarpoq.

Ole Christiansen aperaarput tunisaqarniarunik qanoq iliorsinnaanersut.

- Naatsorsuutigivarput taamatut aktianik tuniniaanerput ukiut marlussuit qaangiuppata ingerlateqqissallutigu, taamanikkussamullu immaqa ulluni makkunani angunngitsuukkavut iluatseriarsinnaassavavut, taama oqarpoq aatsitassarsiorfiup NunaMineralsip pisortaa Ole Christiansen.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq