Nunamineralsimik piginneqatigiilernissaq piuminarnerulissaaq

Aatsitassarsiorfiup Nunamineralsip pappialiaatai nalillit piginneqatigiissutit pisiarineqartarnerat tuniniarneqartarnerallu pisariinnerulissaaq, aningaasanik nalilinnik tuniniaavigisartagaanit, AMP-mit anginerusumut OMX Nordic Exchange Copenhagenimut nuuppat.
Allattoq Jaaku Lyberth
juunip 02-at 2008 15:07

Nunamineralsip pisortaa Ole Christiansen oqarpoq, kikkulluunniit angerlarsimaffimmini internetimut attaveqartut Nunanamineralsip aktie-aataannik pisisinnaallutillu tuniniaasinnaalersut. OMX Nordic Exchange-imut nuunnermi pisisartut Nunamineralsillu aktie-aataannik malinnaasinnaasut amerlanerulissapput. Nunamineralsip aktie-t tuniniagai nutaat 650.000-it tuniniarneqalissapput ataaseq 100 koruuninik naleqarluni.

Aatsitassarsiorfiup Nunamineralsimik piginneqataasut anginerit pingasut, Namminersornerullutik Oqartussat, Lønmodtagernes Dyrtidsfond aamma Rudersdal A/S 60 millioni koruunit tikillugit aktia-nik aningaasaliiumallutik neriorsuippput.

Ole Christiansenip erseqqisarpaa, aatsitassarsiorneq nalorninartoqarsinnaasoq. Aatsitassarsiorneq ingerlanerluppat, aktie-nik annaasaqaataasinnaasoq, ingerlalluarpallu iluanaarfiusinnaalluni.

Nunamineralsip aktie-nik tuniniaavini juunip 18-iani 2008 OMX Nordic Exchange-imut nuussavaa.