NunaMineralsimi piginneqataassutit nalitusipput
Nuna Mineralsimut piginneqataassutit nalingi, nutaarsiassaqartitsivimmit inuussutissarsiornermik sammisaqartumit, Bloombergimit, oqaatigineqarpoq 16 procentinik qaffariaateqarlutik, piginneqataassut ataaseq 220 koruunilerlugu Københavnip pappialanik nalilinnik tuniniaasarfimmi Fondsbørsenimi ullaaq tuniniaasoqalermat pisiarineqarsinnaalerpoq.
- Suliniutit angisuut pillugit inatsisip tallimanngormat akuersissutigineqarnera, uagullu Kujataani kuultimik nassaarnerput, piginneqataassutitta nalingisa qaffannerannut pissutaasut qularutissaanngilluinnarpoq, NunaMineralsip pisortaa isumalluaqisoq, Ole Christiansen, Radioaviisimut oqarpoq.
NunaMineralsimut piginneqataassutinik qaammatini kingullerni pingasuni tunisat marloriaatingajaannik ullumi tunisisoqartoq, Bloomberg allappoq suliniutillu angisuut pillugit inatsisip akuersissutigineqarnera piginneqataassutit nalingisa NASDAQ-ip Københavnimi immikkoortortaani qaffariataarnerannut nutaarsiasaaqartitsiviup aamma pissutaatippaa.
