NunaMinerals ukioq ataaseq akiliisinnaajunnaaqqareerpoq
Sapaatiummat aatsitassarsiortitseqatigiiffiup Nunamineralsip akilersuinerminik unitsitseqqanerata ulluisa kingulleraat. Akilersuinermik uninngatitsineq maajip 15-anut 2015-imut atuuppoq, arlaleriarlunilu sivitsorneqartarluni.
maajip 18-at 2016 17:53
Tassalu sapaatiummat piginneqatigiiffik akilersuinerminiit unitsitsisinneqarmalli ukioq ataasinngorpoq, mannalu naammalertoq, Kalaallit Nunaanni Eqqartuussivik KNR-imut oqaluttuarpoq.
- Akiliisinnaajunnaartarneq pillugu inatsit paragraf 16, immikkoortoq aappaat naapertorlugu sivisunerpaamik ukiumi ataatsimi akilersuinermik unitsitsisitsisoqarsinnaavoq - ukiorlu ataaseq qaangiutereerpoq - taamaammat akilersuinermik uninngatitsisitsineq sapaatiummat maajip ulluisa 15-anni 2016-mi atorunnaarpoq, eqqartuussisuugallartoq, Lars Christian Sindbæk Radioavisimut oqarpoq.
Tamanna isumaqarpoq Nunamineralsip akiitsoqarfii akilersuinermik unitsitseqqanerani akileeqqusisimanngitsut maanna akileeqqusisinnaanngortut.
