NunaMinerals-ip aatsitassarsiornini annertusivaa

NunaMinerals-ip guld-isiornini allanillu aatsitassanik erlinnartunik ujarlernini annertusivaa.

Namminersornerullutik Oqartussat tallimanik akuersissutinik nutaanik tunniusseqammerput. Nuup eqqaani Isua-ni Agdlumersamilu guld-inik nassaartoqarnissaa neriuutigineqarpoq.

Nuup kujataatungaani guld-inik kanngussanillu nassaarnissaq neriuutigineqarpoq. Kiisalu Nuup avannaatungaani Niaqunngunami platini-imik nassaarnissaq aamma neriuutigineqarluni.

NunaMinerals-ip aamma Paamiut eqqaanni guld-inik ujarlersinnaanissaminik akuersissummik tunineqarpoq, kiisalu Nuup eqqaani Qeqertarsuarmi aatsitassanik erlinnartunik misissuinini annertusisinnaallugu aamma akuerisaasimalluni. Taamaalilluni qeqertami misissuinerit marloriaammik annertusineqarput.

NunaMinerals-illi naatsorsuutigivaa aatsitassanik ujarlernerit annertusineqartut ukiorpassuit qaangiuppata aatsaat aatsitassarsiorfinnik nutaanik ammaasoqarnissaanik kinguneqarsinnaassasut.

-Misissuinerit takutippaat soqartoq. Suliassarli annertooq tassaavoq aatsitassat sumiinneri nassaarissallugit, taamaalillunilu piiaaneq akilersinnaasumik ingerlanneqarsinnaalersillugu, NunaMinerals-imi aningaasaqarnermut pisortaq Martin Ben Shalmi oqarpoq.

Tamannalu ukiorpassuusinnaasoq naqissuserpaa.