NunaMinerals eqqornerlunneqarpoq

Aatsitassarsiorfimmi NunaMineralsimi piginneqataasup siulittaasullu tulliatut inissisimasup Carsten Bergerip NunaMineralsimi piginneqataassutai naleerummata tuniniarneqalerput.
juulip 05-at 2010 05:25

Carsten Berger NunaMineralsip aktiaataanik 19,5 procentinik piginneqataavoq. Carsten Bergerip aningaasarsiornikkut ajornartorsiorneratigut NunaMineralsimik piginneqataanera eqqugaavoq, aviisi Børsen taamatut allaaserisaqarpq.

- Aktiaatitta nalingi kuultip akitsoriartorneratut qaffassimanngillat. NunaMineralsip aktiaataanik annertuunik piginneqataasup aningaasarsiornikkut ajornartorsiornera tusagassiuutitigut eqqartorneqartillugu NunaMineralsip aktiaatai nalikilliartorput, aatsitassarsiorfiup NunaMineralsip pisortaa Ole Christiansen aviisimi Børsen-imut oqarpoq.

Carsten Berger NunaMineralsip siulersuisuini siulittaasup tulliatut inissisimavoq. Siulittaasup tulliatut inissisimavoq ukioq ataaseq sinnerlugu, naak piffissami tassani akiliisinnaajunnaartutut nalunaarutigineqareeraluartoq.

Carsten Bergerip suliffeqarfiutaa Rudersdal apriilip qaammataani akiliisinnaajunnaartutut nalunaarutigineqarpoq, maannalu Kalaallit Nunaanni kuultisiornermik ingerlatsinermik aningaasaliissutai naleerupput.

Carsten Bergerip NunaMineralsimik piginneqataassutai naleerummata tuniniarnissai ajornakusuussapput, tamannalu NunaMineralsip piginneqatigiissutaasa aningaasatigut nalikillineranik kinguneqassaaq.