NunaMinerals Canadami misiliiniarpoq
NunaMineralsip pappialiaatai nalillit aatsitassarsiortut akornanni Københavnimi pappialani nalilinnik niuffaffimmi, Københavns Fondsbørsimi, kisimik tuniniagaapput. Pappialaataalli nalillit aningaasaliisartunit maluginiarneqarpiarneq ajorput.
Piginneqatigiiffiup kujataani nunami 1.000 kvadratmeterisut annertutigisumi kuultimik nassaarnermi tupaallatitsisoq, Torontomi pappialanik nalilinnik tuniniaasarfimmi tuniniaalerniarnermini piukkunnassutsimut uppernarsaatitut, atussagaa Nunamineralsip pisortaanerata Ole Chrisitiansenip naatsorsuutigaa.
- Kuultimik nassaarnerput pappialanik nalilinnik tuniniaavissuarmi pappialaatitsinnik nalilinnik tuniniaasinnaalernissatsinnut atussamaarparput. Aningaasaliisartunik nunani tamalaaneersunik piginneqataalersitsiniaaniarpugut, taamaalilluta piginneqatigiiffiup aningaasat nammineq pigisai ukiualuit ingerlaneranni malunnartumik amerlisillugit, Ole Christiansen oqarpoq.
Københavnimi pappialanik nalilinnik tuniniaavimmi tuniniakkatta piffissami qaninnermi amerlinissaat nalilersussavarput, taamaalilluta Torontomi tuniniaavimmi peqataalernissami aningaasanik pigisaqassutsimik piumasaqaataasut naammassisinnaalerniassagatsigit, Ole Christiansen Berlingske-mut oqarpoq.
Nunamineralsip Københavnimi tuniniakkanik siullermik amerliliinikkut tullianilu Torontomi tuniniaalernikkut neriuutigaa, 90 millionit koruninik, misissuinermi qillerinernut akilersinnaassutsimillu nalilersuinermut atugassanik pissarsisinaassalluni.
- Aningaasat taakkua peqassutsimik misissuilluni qillerinissamut suliniutittalu imminut akilersinnaassusianik nalilersuinissamut nammassapput. Kuulteqarfimmik, assersuutigalugu Amerika avannarlermi kuulteqarfittut angitigisumik nassaassagaluarutta, taava kujataani piaavimmik pilersitsineq 500 millionit dollarit - imaluunniit 3 milliardit koruunit missaannik aningaasartorfiusariaqassagunarpoq, Ole Christiansen oqarpoq.
Nunaminerals 1999-imi pilersinneqarpoq, tassanngalu piginneqataassutit, maanna 180 millionit koruunik missaannik naleqartut, pappialanik nalilinnik Københanvimi tuniniaasarfimmi OMX-imi tuniniarneqarsinnaallutik.
Piginneqataasut 2.000-nit amerlanerupput. Piginneqataasuni Namminersorlutik Oqartussat annerpaapput, piginneqataasutut 33 procentii pigalugit, taava Lønmodtagernes Dyrtidsfond 17 procentinik aamma Nykredit Bank 13 procentinik pigisallit tulliullutik.