NunaMinerals amigartooqqippoq

Misissuinernut arlalinnut aningaasaliinerup kingorna suliffeqarfiup amigartoornissani naatsorsuutigereersimavaa, NunaMineralsip pisortaa, Ole Christiansen nassuiaavoq.

- Aatsitassarsiornermi misissuinerni piffissaq sivisooq atorneqarsimavoq. Pilersaarutit arlallit maanna aallarnisarneqalerput, naatsorsuutigineqassaaq suli ukiut qulit missaanni misissuinerit ingerlanneqarnissaat, tassami aatsitassarsiorneq ullormiit ullormut pilersinneqarneq ajorpoq, Ole Christiansen KNR-imut oqarpoq.

Niaqornaarsuup qeqertaasaani, Kujataaniittumi, kuultimik aasaq juulimi nassaarneq pisortap taakkartugaannut ilaavoq.

2007-imi NunaMineralsip aktiaataasa nalingi qaffasinnerpaasimapput, aktiamik 100 koruunip nalinganut pisigaanni akiliutigineqartarluni 475 koruuni. 2007-ip kingorna NunaMineralsip aktiaataasa nalingi appariartulersimapput. Ullumi aktianik pisigaanni akiliutigineqartarpoq 220 koruuni, tassa imaappoq ukiuni kingullerni NunaMineralsip aktiaatai taamanernit affaa qaangerlugu appariarsimallutik.

Taamaakkaluartoq Ole Christiansen oqarpoq, suliffeqarfiup misissuinerisa inerneri naapertorlugit suliffeqarfik isiginiarneqassasoq:

- Aatsitassarsiornermi misissuinerit inernerisa pitsaasuunerisa paasinarsippaat soorunami aktiaatitta nalingi qaffassasut, Ole Christiansen oqarpoq.

Ukioq 2010 tamaat isigalugu, NunaMineralsip naatsorsuutigaa 5 million koruunit 10 million koruunillu akornanni amigartoorumaarlutik.