Nunami suliffeqarfiit akuutinneqassapput

Qeqertarsuup avataani Cairn Energyp uuliamik ujarlernerata kinguneranik illoqarfinni suliffissaqartitsilersinnaassaaq. Tamanna anguniarlugu inuiaqatigiit ingerlaavartumik iluaqutigisinnaasaannik isumaqatigiissut nutaaq imaqassaaq.
aggustip 06-at 2010 05:54

Isumaqatigiissutissami allassimavoq, suliffeqarfiit sulisussallu misissuinerni akuutinneqartarnissaat. Uuliasiortut piumasaqaataat anguniarlugit, sulisussanik suliffeqarfinnillu pikkorissartitseqqaartarnissaq anguniarneqarpoq.

Aatsitassanut Naalakkersuisup, Ove Karl Berthelsenip isumaqatigiissut iluarisimaarpaa:

- Suliniutit taakku suliassaqarfimmi tassani periarfissat suuneri pillugit ilisimasaqarnerulersissavaatigut, peqatigisaannillu suliffeqarfiit kalaallinit pigineqartut ukioq manna suliassaqalereersussaassapput, Ove Karl Berthelsen tusagassiutinut nalunaarummini taama allappoq.

Paasisitsiniaaneq siunertaralugu septembarimi Ilulissani naapeqatigiittoqartussaavoq.

Kalaallit Nunaanni Cairn Energyp pilersaarusiortuata, Ian Watt isumaqatigiissut nuannaarutigaa:

- Cairn ajornartinnagu nioqqutissanik kiffartuussissutissanillu Kalaallit Nunaanneesunik atuiniarpoq. Aamma Cairnip ajornartinnagu ingerlatat najukkami innuttaasunut sunniutissaasa annikinnerpaaffianiitinnissaat ilugersuutigissavaa, Ian Watt oqarpoq.

Cairn Energyp Naalakkersuisullu atsioqatigiinnerisa saniatigut Qaasuitsup Kommunea, Qeqqata Kommunea Kommuneqarfik Sermersoorlu atsioqataasunut ilaapput.