Nunami qeriuaannartumi Audi misilerarneqalerpoq
North Slope Boroughip eqqaani nunami qeriuaannartumi biilinik misileraaffissaq Volkswagenimit toqqarneqarpoq. Volkswagenillu qinnuteqaataani, Alaskami pinngortitaq pillugu oqartussaqarfimmit akuerineqartussami atuarneqarsinnaavoq, misileraanermi nunap qeriuaannartup ajoqusinnginnissaa pillugu misileraaffik nuunneqartassasoq.
USA-p naalagaaffiini kommunit avannarpasinnersaanni North Slope Borough inissisimavoq, tassa Issittup imartaanut qaninnerpaalluni. Tamaanilu najugaqartut tassaapput Inuppiaat. Tassalu misileraaffissaq nunaminertaq, taakkunannga attartorniarlugu Volkswagenimit siunnersuuteqarlutik.
Misileraanermi inernerit isertuunneqassapput
Audit motooriisa issittumi misiligarneqarlutik ilisimatusarfigineqarnissaat taamatullu inerisarneqarnissaat pigaaruteqartuusoq, Volkswagen qinnuteqaamminni allapput.
Taakku aamma allallutik misileraanermi inernerit sapinngisamik isertuunneqartussaassasut.
Ukiup issinnerpaaffiata nalaani biilit qulit ullormut misilerarneqartassasut biililiorfissuup Volkswagenip naatsorsuutigaa.
