Nunami eqqissisimatitami uuliamik qalluisoqassanngilaq

USA-mi inatsisartut arlaasa Senat-it, Alaskami nunami eqqissisimatitami uuliamik qalluisinnaaneq itigartitsissutigaat. Assortuunnertaqanngitsuunngitsumilli.

Ilimagineqarpoq Alaskami nunap qeriuaannartup ataani uuliaqartoq nappartat 10.000 milliardit imarisinnaasaannik. Attorneqassanngilarli. BBC-mi oqaluttuarineqarpoq USA-mi inatsisartut arlaasa Senat-it amerlanerussuteqaqqalaarlutik itigartitsissutigigaat.

Præsident George W. Bush siuttoralugu parteeqataasa Republikanerit Alaskami nunami eqqissisimatitami uuliamik qalluisoqarnissaa piumasarigaluarpaat. Bush-ip anguniagarilluinnagaasa ilagaat issittumi pisuussutit qallorneqarnissaat.

Iluatsingajalluinnarpaat, taasisummi sisamanik amerlanerussuteqalaarlutik itigartitsipput.

Akerliusut – Demokraatit – tunngavilersuutigaat issittumi pinngortitap allanngornernut sunnertianera, uuliamillu qalluisoqassagaluarpat qaqugorsuarmut iluarseqqinneqarsinnaangitsumik akornuserneqartussaanera – uumasorpassuarnullu ulorianartorsiulersitsisinnaanera.

Illersuisut tunngavilersuutigigaluarpaat Kangiani Qiterlermiit uuliamik eqqussuineq killilersimaarneqarsinnaagaluarnera, aningaasarsiorfiulluarsinnaanera suliffinnillu nutaanik pilersitsiviusinnaanera.

Alaskami nuna eqqissisimatitaq nunarujussuuvoq, 19 million hektarinik annertussusilik, ukiullu 50-it kingulliit uuliamik qalluisinnaaneq pilerigineqartuarsimavoq.