Nunalerisut panernersuaqarneranit eqqugaasut ikiorsernialeraat

Kujataani ukiormanna panernersuaqarnera pissutigalugu ilungersunatorsiorfiusoq siunnersuisoqatigiinnit oqaatigineqarpoq, taamaattumillu Naalakkersuisut immikkut ittumik nunaatilinnut aningaasaliinissaannik inassuteqarput.

Pissutsit ilungersunartut ingerlaannassappata nerukkaatissanillu pisariaqartitsineq annertunerulissappat umiarsuarmik immikkut ittumik attartornissaq Naalakkersuisut akuersissutigisariaqaraat, Nunalerinermut Siunnersuisoqatigiit tusagassiuutinut nalunaaruteqarlutik taama allapput.

AAMMA ATUARUK Nunaatillit panernersuaqarneranit eqqugaasut

Siunissaq eqqarsaatigalugu Nunalerinermut Siunnersuisoqatigiit isumaqarputtaaq nunaatilinnut imerterutit pisariaqartinneqartut pissarsiarineqartariaqartut. Aammalu imerterutinik annertunerusumik pisaartornissaq pisariaqartoq, siunissami nerukkaatissanik nunatsinneersunik aalaakkaanerusumik pissarsisoqartassappat.

Nunalerinermut Siunnersuisoqatigiiit inassuteqarnerminni Kommune Kujallermi borgmesteri Jørgen Wæver Johansen taperserpaat, taannami nuna tamakkerlugu politiikerinut qanittukkut oqariartuuteqarpoq kujataani panernersuaqarnera pissutigalugu savaatillit ikiorneqarnissaannik kaammattuilluni.