Nunalerinermut politikkissaq uninngaannarpoq

aggustip 24-at 2006 12:46

Nunalerineq pillugu politikkissamik nalunaarut siornali Nunalerinermik Siunnersuisoqatigiit suliaat Naalakkersuisuni uninngaannalerpoq, Naalakkersuisut taarseraannerat qinersisoqarneralu pissutigalugit. Nalunaarut, Inatsisartut aappaagu upernaakkut ataatsimiinneranni oqaluuserineqartussaq, tuaviuuteqquneqalerpoq, ukiamut siuarteqquneqarluni, taama oqarpoq Kaj Egede, Nunalerinermik Siunnersuisoqatigiit siulittaasuat.

Imarivai; nunalerinermi tapiissuteqartarnermi periaatsit aalajangersimasuunissaat, nunani allani unammillertitsinnut naapertuuttuunissaat, aamma savanik tunisassiornerup qanoq annertutigisumik annertusarneqarnissaa ukiuni tulliuttuni pissanersoq.

Kaj Egede aperineqarami, sooq nunalerineq pillugu erseqqissumik politikkeqalerumalernersut, akivoq, taamaaliornissamut kissaateqarnerminnut pissutaasoq, nunalerineq siumut pilersaarusiorluakkamik ineriartortinneqartariaqartutut isumaqarfigigamikku, aamma nunalerinermut tunngatillugu politikkip allanngorarnera qimanneqartariaqartutut isumaqarfigigamikku.

- Ukiamut suliarineqarnissaanik inassuteqarnitsinnut aamma pissutaavoq, Inatsisartut inuussutissarsiornermi peqqussutaata ukiamut nutarterneqarnissaa, suliarineqartussaanera, isumarpullu malillugu, nunalerinermut politikki, aamma nunalerinermut tapiissuteqartarnermut politikki, imminnut ataqatigiittariaqarput. Ataqatigiinngippata inatsisinik allanngortitsisaqattaarnermik tamanna kinguneqartussaavoq, Kaj Egede oqarpoq.

Kaj Egede naapertorlugu, Nunalerineq pillugu politikki 2010-p tungaanut atuuteriarluni nutarterneqassaaq.