Nunalerineq tassaannaanngilaq savat nersussuillu

Savaateqarneq nersussuaateqarnerlu Atlantikup Avannaani nunalerinermi kisimik aallunneqartariaqanngillat.
februaarip 26-at 2011 11:34

Savalimmiuni nunalerineq ileqqutoqqat malillugit ullumikkut pinerusarpoq, savaateqarneq nersussuaateqarnerlu nalinginnaanerullutik. Periarfissat allat pioreersut atorneqalernissaat eqqarsaatigalugu, Savalimmiuni suliniaqatigiiffiit sisamat, nunalerinermik sulialinnut attuumassuteqartut, nunalerinerup allatut ingerlanneqarsinnaanera pillugu ataatsimiitoqarnissaanik aaqqissuussisimapput.

200-t sinnillit peqataapput, Savalimmiunit, Kalaallit Nunaannit, Islandimit Norgillu sineriaanit oqalugiartoqarluni. Atlantikup Avannaani nunaatillit paarnanik nioqqutissiorsinnaanermik, takornariaqarnermik, silami puulukiuteqarsinnaanermik ivikkanillu nutaanik naatitsisarsinnaanermik oqalugiarfigineqarput.

Periarfissaq alla taaneqartoq tassaavoq nerisassanik akimarpasissunik illinnarsaakkanillu nioqqutissiorsinnaaneq. Tamaani nioqqutissiat ukiuni kingullerni atorneqaleqqissimapput, nioqqutissallu pitsaassusiinik naliliisarfik, Arctic Quality, ataqatigiimmik aaqqissuussisussaavoq, nerisassat issittumeersut, aamma Atlantikup Avannaaneersut, pitsassuullutillu nungusaataanngitsumik atorneqartarnerat atuisunut uppernarsassallugu.

Nunatsinni Kujataani Norgillu Avannaani misilittakkat ataatsimiinnermi aamma oqaluuserineqarput, unamminartut periarfissallu arlalissuit Savalimmiunisuulli nunani taakkunani aamma atorneqarsinnaasut ersarissumik paasinarsilluni. Atlantikup Avannaani Suleqatigiiffik, NORA, nittartakkamini taama allaaserisaqarpoq.