Nunalerineq pillugu Siunnersuisoqatigiit akitsuutit ajorivaat
Nunalerineq pillugu Siunnersuisoqatigiit Qaqortumi januaarip ulluisa 31-anni ataatsimiinnermik kingorna tusagassiuutinut taama allapput.
Inatsisissamut siunnersuummi nunalerinermi inuussutissarsiummut savaatilinnullu ataasiakkaanut aningaasatigut qanoq kinguneqassanersoq naatsorsorneqarsimanngitsoq, Nunalerineq pillugu Siunnersuisoqatigiit isumaqarput.
Assersuutigalugu, savaatilik tallimanik traktoriutilik, marlunnik biililik, marlunnillu qamuteralaatilik, inuussutissarsiornermut siunertaqartumik atorneqartut, ukiumut akileraarutinut 140.000 koruunit tikillugit akiliisalissaaq.
Inatsimmi, 2004-mi allanngortinneqartukkut, savaatillit akileraaruteqartussaajunnaarsinneqarput, savaatillillu akileraarutinik akiliisannginnerat attatiinnaqqullugu Nunalerineq pillugu Siunnersuisoqatigiit Naalakkersuisunut inassutigaat.
Innaallagissamut imermullu akiliutigisartakkat apparteqqullugit Narsami toqoraavik Neqi A/S Naalakkersuisunut aamma allagaqarnikuuvoq, taamaalilluni toqoraavik aalisarnermillu inuussutissarsiuteqartut naligiilissammata.
Nunalerineq pillugu Siunnersuisoqatigiit siulittaasuata Niels Lundip, nuannaarutigaa, nersutit nakorsaannik aalajangersimasumik Nunatta Kujataani atorfinitsitsisoqarsimanera, suleqatigiilluarnerlu pilersinneqareerluni, siunissamilu annertusarnissaa savaatilinnit qilanaarineqartoq unnerpaa.
