Nunalerineq pillugu inatsisissaq kinguarteqquneqarpoq

-Maannamut tusarniaanermi piffissaq sivikitsuinnaasimavoq, taamammat inatsisissatut siunnersuutip aalajangiiffigineqarnissaa ukiumik ataatsimik kinguartinneqartariaqaraluarpoq, Nunalerineq pillugu siunnersuisoqatigiit siulittaasuat, Suka Frederiksen oqarpoq.

Siunnersuisoqatigiit Nunalerinermut Naalakkersuisoq, Ane Hansen ataatsimeeqatigigamikku kissaatiminnik saqqummiussisimapput.

Savaatillit akisuunik pisissagunik aningaaserivimmut aningaasanik atorniarneraangamik massakkut peqqussut atuuttoq malillugu pisortat qularnaveequsiinissaat periarfissaavoq. Inatsisissamilu nutaami tamanna peerniarneqarpoq, savaatilik nammineerluni qularnaveequsiisariaqalissalluni.

Assersuutialugu traktorisiniarnermi,

nerukkaatissarsiniarnermilu pisortat qularnaveequsiisarput.

-Nuna ukiut kingulliit marluk paneqimmat nerukkaatissarsiniarnermi savaatillit aningaaserivimmut attartornikkut 7 millionit koruunit nalinginut nerukkaatissarsiniarsimapput. Taamaammat qularnaveequsiisoqartarunnaasappat tamanna savaatilinnut kinguneqarnerluttussaavoq, Suka Frederiksen oqarpoq.

Ilanngutassiaq Qanoruukkut unnugu takujuk.