Nunagisamik pingaartitsinerulerneq alliartulerumaarpoq
- Assersuutigalugu Kina-meersunik, USA-meersunik imaluunnit allameersunik nunasiortortut amerlasuut takkussuukkaluarpata ilimanaateqarsinnaavoq tamanna Kalaallit Nunaanni nunagisamik pingaartitsinerulernermik kinguneqartoq, kalaallillu amerlanerusut assigiinngissutsinik, kulturikkullu assigiinngissuseq kalaaliussutsillu ilisarnaatai isiginiarneqarnerulernissaat ilimagineqartariaqartoq, Lars Hovbakke Sørensen, Københavnip Universitet-iani iliniartitsisuusoq isumaqarpoq.
Taassuma Maniitsup eqqaani aluminiumik aatsitsiviliortoqassappat sulisartut 2600-it tikisinneqarnissaanik Alcoa-p kissateqarnera aallaavigaaa.
Nunagisamillu pingaartitsinerulerneq nunasiortortuinnarnut sammitinneqarnavianngilaq.
- Soorunami siullermik uumiginninneq avataanersunut takkuttunut sammitinneqassaaq aammali ungasinnerusoq eqqarsaatigalugu, kalaaliussutsip qallunaajussutsillu assigiinngissutaat isiginiarneqarnerulersinnaasoq naatsorsuutigineqarsinnaavoq aammalumi tamanna ukiut siuliinut sanilliullugu avissaarnissamik suliniuteqartunut iluaqutaasinnasoq ilimagineqarsinnasoq, Lars Hovbakke Sørensen isumaqarpoq, taassumallu ilimatsaassaqarnini nunani allani misilittakkaneersuunerarpaa:
- Europami naalagaaffinni arlaqartuni takoreernikuuvarput, ilaatigut nunasiortortut amerlaneruleriartuinnarneranik pissuteqartumik Danmarkimi qinersinermi kingullermi Dansk Folkepartiip katersuuffiunerujussua assersuutissaavoq. Tassungalu assingusut aamma Islandimi pipput, tassami Keflavik-mi sakkutooqarfik sorsunnerup nillertup nalaani amerikamiorpassuarnit najorneqarmat tamannalu Islandimiorpassuarnut amerikamiunut sakkortuumik akerliunermik misigisitsisarmat tamatumalumi kinguneraa kommunistit partiaata katersuuffiunerujussua.
Lars Hovbakke Sørensen-ip oqarnera naapertorlugu nunasiortornermi nunagisamik pingaartitsinerulerneq pinngitsoorneqarsinnaanngilaq. Qanorli annertutigisumik aammalumi qanoq kinguneqassanersoq uagut sunniuteqarfigisinnaavarput - akisussaaffillumi naalakkersuinermik suliaqartuniittoq, taanna oqarpoq nangillunilu:
- Isumaginninnikkut ajornartorsiutit aaqqinneqarpata imaluunniit iliuuseqarfigineqarpata nunagisamik pingartitsineq minnerulersinnaavoq. Nunanimmi allamiunik akulerutsitsinialinnginnermi kalaalerpassuit ajornartorsiuteqarlutik misigisimagunik aaqqinneqaqqaartariaqartunik taava nunagisamut annertunerusumik pingaartitsinermut tapersersuisoqalernissaa ersarilluarpoq, Lars Hovbakke Sørensen oqarpoq. Alla pingarutilik tassaavoq innuttaasunik paasisitsiniaaneq:
- Aammattaaq pingaaruteqarpoq, nunanit allaneersut iluaqutissarsiffigineqarsinnaanerat aningaasaqarnikkullu Kalaallit Nunaanut iluaqutaasinnaanerata innuttaasunit tamanit maluginiarneqarnissaa - ingammik ilisimasanik siammarsaanissaq politikerinit akisussaaffigineqarpoq. Nunagisamimmi pingartitsinerup minnerulersinneqarnissaanut tamakku pissutaaqataasinnaapput, Lars Hovbakke oqarpoq.