Nunaateqarneq siuarsarusuppaa
Nunaateqarnikkut uumasuuteqarnikkullu siuarsaaneqassaaq. Naalakkersuisut siulittaasuat Hans Enoksen ukiortaami oqaaseqarnermini aqqutissiueqataaniarlutik neriorsuutigaa. Nunaateqarnerli siuarsarlugu kujataani aallartilluareerput:
Kalaallit Nunatsinni nersussuaatitta immui maqerlaat, savat meqquinik tippiliat naatsiiallu ullumikkornit pitsaanerusut. Tamakkuupput nunatta nunaateqarnikkut uumasuuteqarnikkullu imminut pilersornerunissaa anguniarlugu suliniutaalersut. Ineriartortitsisusupput kujataani Qaqortup eqqaani Upernaviarsummi misileraavik.
Savat meqqui ukiuni arlalissuanngortuni atorneqaratik ikuallanneqaannartartut maanna atorluarneqalerput. Savat meqqui 6 tonsit Litauenimut juullingajalersoq nassiunneqarput, tappavani nuersagassaliarineqassallutik. Savat meqquinik suliareqqitassanik aatsaat avammut nassiussisoqalinngilaq katillugimmi siorna 12 tonsit nassiunneqarsimapput. Nuersagassaliat ilaatigut tippiliornernut atorneqarput.
Nunatsinni immitsinnut immummik pilersorsinnaalernissarput anguniarlugu suliniut tamakkiisumik aningaasassarsiuunneqaleruttorpoq, siornami misileraanerit takutippaat immuk nunatsinni nersussuaatigilikkaneersoq piumaneqarluartoq.
Naatsiiat nunatsinni naatitat aamma piumaneqarluarput, taamaattumik atuisartut pitsaanerusunik pisiassaqaleqqullugit naatsiiassat suut nunatsinnut piukkunnarnerunersut misissorneqartuarpoq.
Anguniarneqarpoq naatsiiat amerlanerusut siusinnerusukkullu katersorneqarsinnaasut pilersinneqarnissaat.
Savaatillit savaaqqat toqoraaviliaassaat 20.000-iusut tamarmik tunineqarsimalerput. Siunertaavoq savaaqqanik ukiumut 26.000-inik tunisassiortalernissaq.
