Nuna tamakkerlugu serlersaarinerit
Politiit sineriammi tamarmi ulloq unnuarlu kingullermi piffissani assigiinngitsuni assigiinngitsut pillugit nalunaarfigineqartarsimapput. Kalaallit Nunaanni Politiini pigaartut pisortaat Aputsiaq Hansen taamatut ilisimatitsivoq.
Aqqusinermi angallannermi ajutoornerit, angerlarsimaffimmi eqqissiviilliornerit serlersaarinerillu, aqqusinermi eqqissiviilliornerit, tillinnerit imigassartorsimatillunilu ingerlatsisimanerit nalunaarutit ilagaat.
Ingammik Illoqarfinni Narsami, Sisimiuni, Qaqortumi Nanortalimmilu serlersaarinerit amerlanerupput. Tasiilamili marlunngornermi serlersaarinertulli amerlatiginngillat.
Aqqusinermi angallannermi ajutoornerit arlallit
Ulloq unnuarlu kingulleq aqqusinermi angallannermi ajutoornerit sisamat politiit nalunaarsorpaat. Taakkunannga pingasut Nuummi pisimapput. Qujanartumik ajoqusertoqanngilaq. Ajutoornerit ilaat biilit assakaasuisa aasaanerani atorneqartussat siusinaarluni taarserneqarsimanerannik pissuteqartoq, Aputsiaq Hansen ilisimatitsivoq.
Sisimiuni sisamanngornermi ullaakkut qulit missaanni aqqusinermi angallannermi ajutoorneq ajornerpaavoq. Inuk taanna imigassartorsimatilluni ingerlatsinermigut ajutoornermini ajoquserpoq.
