Nuna tamakkerlugu sap. ak. 18-imi aaqqissuussinernut tapiissuteqarneq

Sap. ak. 18 tassaavoq imigassamik imigassartoriaatsimillu immikkut samminniffik. Ukioq manna silaarunnani imigassartorneq qulequtarineqarpoq. Peqqissutsimut Attaveqarnermullu Naalakkersuisup Steen Lynge-p sap. ak. 18-imi aaqqissuussinernut atugassatut qinnuteqaatit, illoqarfinnit 14-ineersut nunaqarfinnillu 33-ineersut akuersissutigai.

-Sap. ak. 18-imi aaqqissuussinissanut atugassanik qinnuteqarnissamut soqutiginninneq annertooq nuannaarutigeqaara. Sap. ak. 18 ataatsimoorfitsinnik aallaaveqarpoq, imigassartornerlu pillugu pitsaasumik oqaloqatigiinnissamut periarfissiinissaq anguniagassatut siunniussaavoq. Najukkani imigassaq pillugu oqallinneq, peqqissuunissaq anguniarlugu suliniuteqarnermi pingaarutilittut isigaara, Peqqissutsimut Attaveqarnermullu Naalakkersuisoq Steen Lynge oqarpoq nangillunilu:

-Atornerluinerup pitsaaliorneqarnissaanik suliniuteqarnerup ilaatigut atornerluinermut patsisaasut qitiutillugit patajaallisarneqarnissaa, Naalakkersuisut kissaatigaat. Ajornartorsiutip qanoq siusitsigisukkut iliuuseqarfigineqarnera apeqqutaalluni iluatititsissinnaaneq annerusoq, misilittakkat takutimmassuk, atornerluisunik katsorsaanermut tunngatillugu siusinaartumik iliuuseqarsinnaaneq pitsaasunik periarfissikkusupparput. Taamatuttaaq katsorsaanerup ikorfartoqatigiinnerullu eqaannerusumik ingerlanneqarsinnaanera misissorusupparput. Taamaasiornitsigut imigassartoriaatsitta peqqinnarnerusumut saqitinneqarsinnaanera sunniivigerusupparput.

Imigassaq Ikiaroornartorlu pillugit Siunnersuisoqatigiit siunnersuutaat pingasut sap. ak. 18 -mi tunngaviusut tassaapput:

Meeqqat inuusutullu 18-iliineqanngitsut imigassartunngilluinnartariaqarput. - Naartuguit - imigassartoqinak. Naartulernissat pilersaarutigigukku imigassartoqinak. -  Imigassartornermi imertarfiit tallimat sinninngisaannakkit.