Nuna tamakkerlugu inunnut innarluutilinnut sullissivik ammarneqassaq

Nuna tamakkerlugu inunnut innarluutilinnut sullissivik, Pissassarfik, Sisimiuni ullumi ataasinngornermi pisortatigoortumik ammarneqassaaq.

Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisup Sara Olsvigip inunnut innarluutilinnut sullissivik nalunaaqutaq 13.00 atoqqaartissavaa.

Sisimiuni ammaanersiorneq internettikkut toqqaannartumik malinnaavigineqarsinnaasoq, Naalakkersuisut paasissutissiipput.

Sullissivissap siunertaraa, innuttaasut innarluuteqartut inuunerinnerulernissaat kiisalu inuunerminni atukkatigut nalinginnaanerusumik inuiaqatigiinni akuusinnaanissaat suliffeqarfinnullu atassuteqarnermikkut periarfissaginnerulernissaat sulissutigissallugu.

Sullissiviup neqeroorutigissavai siunnersuineq, ilitsersuineq aammalu inunnut innarluuteqartunut sungiusaaneq. Sullissivik qanigisaasut inunnullu innarluutilinnut sullissisut aamma siunnersortarlugillu ilitsersortassavai, Naalakkersuisut taama paasissutissiipput.

Sullissiviup 2017-imi ukiakkut ammarneqarnissaa naatsorsuutigineqarsimagaluarpoq, aatsaalli maanna ammarneqarluni.