Nuna tamakkerlugu aningaasanik katersuiniartoqalerpoq

Meeqqanut inuusuttunullu suliniaqatigiiffik Nanu, suliniaqatigiiffiit inuussutissarsiutinillu ingerlataqartut allat peqatigalugit, nuna tamakkerlugu aningaasanik katersuiniartitsinissamik piareersaaleruttorpoq.
Allattoq Jaaku Lyberth
apriilip 30-at 2009 06:31

Meeqqanut inuusuttunullu kinguaassiutitigut atornerlugaasimasunut illumik pilersitsinissaq, aamma Kalaallit Nunaanni illoqarfinni nunaqarfinnilu tamani meeqqat inuusuttullu ornittagassaannik pilersitsinissaq siunertaralugu, aningaasanik katersuiniarnerneq ingerlanneqassaaq.

Katersuiniarneq maajip ulluisa arfineq pingajuanni qulingiluaannilu ingerlanneqassaaq, aaqqissuussinerillu KNR TV-kkut Nuuk TV-kkullu aallakaatinneqassapput.

Erinarsortartut atisanillu ilusilersuisartut tusaamasat erinarsorlutillu atisanik takutitsissapput, kulturikkut illorsuarmi Katuami taamatullu Air Greenlandip hangariani.

Meeqqat inuusuttullu pillugit suliniaqatigiiffiup Nanup siulittaasua Kristine Winberg oqarpoq, katersuiniarnermi peqataasut aaqqissuussisullu namminneq kajumissutsiminnik akissarsiaqaratillu sulissasut, taamatullu Danmarkimit tikeraat aamma akissarsiaqaratik sulissasut.

Einarsortartut tusaamasat tusarnaartitsisussat ilaatigut tassaapput Julie Berthelsen, Søs Fenger aamma Caroline Henderson. Atisanik ilusilersuisartut Helene Steensby, Charlotte Sparre Henriette Zobelilu atisanik takutitsissapput.