Assit takukkit: Nuna tamakkerlugu angajoqqaanut misissuutit pillugit akerliussutsimik takutitsineq

Kalaallinut angajoqqaanut Danmarkimiittunut angajoqqaanik misissuutinik atuisoqartarnera piffissami sivisuumi oqallisigineqarpoq. Inuit naammagisimaarinninnginnerminnik takutitsiniarlutik nunarput tamakkerlugu ippassaq akerliussutsimik takutitsipput.
Angajoqqaanut misissuutinik atuisoqartarnera akerliuffigalugu Nuummi pingajussaanik ippassaq akerliussutsimik takutitsisoqarpoq. Assi © : Gaaba Olsen / KNR
Angajoqqaanut misissuutit piffissami sivitsortumi isornartorsiorneqarput, misissuutinni kalaallit angajoqqaat meeraannik pinngitsaaliissummik arsaarinnittoqarneranik ajornerpaamik kinguneqartarput. Assi © : Gaaba Olsen / KNR
Nanortalimmi, Itoqqortoormiini, Qaqortumi, Ilulissani, Aasianni, Tasiilami, Nuummi aamma Narsami akerliussutsimik takutitsisoqarpoq. Assi © : Gaaba Olsen / KNR
Angajoqqaanut misissuuitinik atuisoqartarnera pissutigalugu naalakkersuisup, Aqqaluaq B. Egedep danskit isumaginninnermut ministeriannik, Sophie Hæstorp Andersenimik sisamanngornermi ataatsimeeqateqarnissaanik kinguneqarpoq. Assi © : Gaaba Olsen / KNR
Nuummi inuit 100-t missaanniittut akerliussutsimik takutitseqataapput, taakku Inatsisartut allaffiata saavata tungaantu ingerlaaqatigiipput. Assi © : Gaaba Olsen / KNR
Allattoq Nicole Sander Bertelsen
decembarip 11-at 2024 11:01

Ippassaq nunarsuarmi inuit pisinnaatitaaffiinut ulloritinneqarmat nunarput tamakkerlugu ‘FKU unitsilli’ oqariartuutigalugu akerliussutsimik takutitsisoqarpoq.

Akerliussutsimik takutitsisut danskit kommuniisa misissuutinik isornartorsiorneqartunik, angajoqqaanut misissuinermut atorneqartartunik, kalaallinut ilaqutariinnut atuiunnaarnissaat piumasaqaatigaat.

Misissuutit piffissami sivisuumi isornartorsiorneqarput, inuillu arlaleriarlutik akerliussutsimik takutitsinikuullutik. Angajoqqaat piginnaasaannik misissuinerit atorneqartarnerat Nuummi pingajussaanik akerliussutsimik takutitsiffigineqarpoq.

Inuit pisinnaatitaaffiinut tunngasoq

- Tassa ilaatigut ullumi nunat tamalaat akornganni Inuit Pisinnaatitaaffiinut ullorititarivaat, taamaammat pingaartippara aamma maaniinnissaq tassami Inuit Pisinnaatitaaffii innalerneqarmata, Inuit Pisinnaatitaaffiisa Siunnersuisoqatigiivisa siulittaasuat aamma illoqarfiit pingaarnersaanni akerliussutsimik takutitsisut ilaat, Qivioq Løvstrøm, oqarpoq.

- Malugisinnaagatsigu inuppassuit tapersersuisut aamma misigissutsinik ulikkaartut, oqaatigerusutaminnik ulikkaarpasikkamik assut inuit kamassaqarlutik aliasuuteqarlutik tusaaneqartutut misigisimannginnamik taamatut akerliussutsimik takutitseqqippugut, Nuummi akerliussutsimik takutitsinermi aaqqissueqataasoq, Katsi Kleist Eriksen, oqarpoq.

Nunarsuarmi sumiiffinni arlalinni akerliussutsimik takutitsisoqarpoq, tamannalu aaqqissueqataasup nuannaarutigaa.

- Aamma nunarsuarmi massakkut siaruaappoq, malinnaaffigineqarpalulerpoq Danmarkimi pissutsit susoqarnersoq Kalaallinik Danmarkimi taanna nuannersorujuuvoq inuiaqatigiit nunarsuarmi sumi tamaanngaannersut eqqumaffigerpaluttorujussoorpaluppaat Danmarkimi susoqarnersoq ilaa, Katsi Kleist Eriksen oqarpoq.

Angajoqqaanut misissuutinik atuisoqartarnera ukkatarineqarnera pissutigalugu naalakkersuisup, Aqqaluaq B. Egedep danskit isumaginninnermut ministeriannik, Sophie Hæstorp Andersenimik sisamanngornermi decembarip 12-iani ataatsimeeqateqarluni suliaq oqaluuserissavaat.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk

Angut meeqqanut pinngitsaaliilluni kujannissimasutut qarasaasiatigullu persarinninniarsimasutut eqqartuunneqartoq

Anna Wangenheimip Naleraq avoqqaaraa: - Soorunami namminiilivikkusuppugut

Politiit ullormut nalunaarutaat: Aallaasersornermi angut 26-nik ukiulik tigusarineqartoq