Nuna qeriuaannartoq Canadami aamma nikikkiartorpoq
Ilisimatusarnermut tunngasunut nittartakkami tamanna atuarneqarsinnaavoq.
Canadami illoqarfimmi Quebeckimi Uumassusilerinermut Institutimi, Ilisimatusarfimmi Université Lavalimi, ilisimatuut marluk uuttortaasuupput. Taakku isumaqarput, taama ingerlaannarpat tamaani nuna siunissami qanittumi qeriuaannarunnaavissasoq.
Qeriuaannartumik oqaraangatta imaappoq nuna ataavartumik 0 gradip ataaniittuaannartoq. Taamaammat imeq qerisarpoq. Nunarsuup affaani avannarlermi nunap kuartia, tassa 25 procentia, nunaavoq qeriuaannartoq.
Nunap qeriuaannartup nikikkiartorneranut silap kiatsikkiartornera pissutaanersoq uppernarsiuminaappoq, tamaanimi silap pissusaa qanoq issimanersoq oqaluttuarisaanermi allattorneqarsimanngisaannarpoq. Ilisimatuulli, Serge Payette aamma Simon Thibault, isumaqarput ilumut taamaassagunavissoq.
Canadami nunap ilaa qeriuaannartoq uuttortagaasoq tamanna Serge Payettep ukiut 20-t sinnerlugit malittarisimavaa, ukiunilu taakkunani marlunnik kiannerulersimavoq.
Sermersiuup Niels Tvis Knudsenip oqarnera naapertorlugu, Kalaallit Nunaanni nuna qeriuaannartoq Kitaani sinerissamut qanittuni arlalinni peerussimavoq.