Nuna Oil-imi isumalluarput

Nunatta imartaani uuliasiorneq suliffeqarfimmit Namminersorlutik Oqartussanit pigineqartumit, NUNAOIL-imit, suli isumalluarfigineqarpoq. Naak uuliap gassillu aningaasarsiorfigineqarnissaat suli piviusunngunngikkaluartoq.
Allattoq Carla Davidsen
februaarip 21-at 2012 06:17

NUNAOIL-imi pisortaaneq, Hans Christian Olsen, tusagassiuutinut allappoq, uuliaqarneranik gasseqarneranillu tikkuutaasinnaasunik siorna malussartoqartoq, misissueqqissaarnermillu paasissutissat taakkuusut NUNAOIL-ip ukiumoortumik naatsorsuusiaani 1,2 millionit koruuninik ukiup aappassaa sinneqartoorneranut tunngaviusut.

Sinneqartoorutit sajuppillatsitsilluni paasissutissaneersuupput. Ukiullu aappassaa sinneqartoornermut tunngaviupput, inerneq missingersuusiaagaluamit pitsaaneroqisoq.

Hans Christian Olsenip oqarnera naapertorlugu uuliamik nassaartoqarnissaata tungaanut amigartooruteqarnissaq NUNAOIL-imi missingersuusiarisarpaat.

- Misissueqqissaarnermimi paasissutissat aningaasarsiorfigineqarnissaat missingersuusiarisinnaanngilarput. Taamaakkaluartoq 2011-mi iluatsitseqqippugut. Tamannalu tulluusimaarutigilluarsinnaavarput, NUNAOIL-imi pisortaq aamma oqarpoq. Taanna isumaqarpoq uuliap aningaasarsiorfigineqarsinnaalernissaa ilippanaateqarluartoq.

Misissueqqissaarnermi paasissutissat amerliartuinnarnerat Hans Christian Olsenip iluarisimaarpaa, toraagaqarnissamummi periarfissatik taamaalillutik annertusarneqarmata.

Akuersissutini ingerlanneqartuni allanit aningaasalerneqartuni 20-ni NUNAOIL ullumikkut peqataatinneqarpoq, misissueqqissaarfiit katillugit 201.000 kvadratkilometerisut annertutigalutik - tassa Danmarkip angissutsimigut tallimariaataa missiliorlugu.

NUNAOIL-ip aktiatigut aningaasaatai 10 millionit koruuniupput. nammineq aningaasaatai 56 millionit koruuniullutik.