Nuna Mineralsip piginneqataassutit tuniniarai

Nunatsinni aatsitassasioqatigiiffiup Nuna Mineralsip piginneqatigiissutit 120.000-it tuniniarpai. Piginneqatigiissutinillu tuniniakkanit 11.000-it sinneqartut suliffeqarfimmik piginneqataassutaasinnaasut, nutaarsiassaqartitsivik Ritzaumut tusarliussivoq.

Nunamineralsip piginneqataassutai 75.000-it Danmarkimi suliffeqarfimmut Dansk AMP-imut tunineqarput.

Nunaminerals aatsitassarsiortunit nunatsinneersunit kisiartaalluni Danmarkimi Børsikkut piginneqataassutinik tuniniaasarpoq. Suliffeqarfiullu piginneqataassutaanik piserusunneq, Nalunami guldtisiorfiup ammarnerata kingorna annertusiartuinnarsimavoq.

Nunamineralsip Nalunaq GoldMine A/S-imi 17,5 procentit piginneqataaffigai. Nalunaq Gold Minemilu piginneqataassutit sinneri Norgemi aatsitassarsiortumit Crew Cold Corporationimit pigineqarput. Nalunami guldtip pigineqartup annertussusia tunngavigalugu naatsorsorneqarmat katillugit 1 milliard kronenik iluanaarutaanissaa naatsorsuutigineqarpoq. Nunamineralsip Nuup eqqaani qeqertarsuarmi guldteqarneranik misissuinermi kingorna, qanoq annertutigisumik guldteqarneranik paasissutissat, piaalernissamut tunngaviusussat utaqqiinnarpai.