Nuna Minerals piginneqataassutinik niuffaffinni ingerlalluartoq

Naak aatsitassarsiortitseqatigiiffik NunaMinerals, Namminersorlutik Oqartussanit piginneqataaffigineqartoq, ukioq manna amigartooruteqartussatut ilimagineqaraluartoq, piginneqataassutinik niuffaffinni ippassaq ingerlalluarnerpaajuvoq.
novembarip 26-at 2013 06:46

NunaMineralsimmi kujataani Niaqornaarsuup eqqaani Vagarimi kuultisiorfia aatsitassarsiornerup iluani siunnersuisartunit Sverigemeersunit SRK Consultingimit nersorniarneqarpoq, arlaannaannulluunniit attuumassuteqanngitsumik taakku nalunaarusiorsimammata.

Vagarimi misissuinerit 2010-meersut, 2012-imeersut ukioq mannameersullu SRK Consultingip qimerluualaarsimavai, Vagarimilu ukioq manna qillerinikkut qaqitat pitsaassusaat SRK Consultingimit misissorneqarsimallutik. Nalunaarusiamilu inernerit ersaripput.

Vagarimi kuulteqarluarsinnaanissaa ilimagineqarpoq, NunaMineralsillu aappaagu qillerinissaanut pilersaarutit SRK Consultingip isumalluarfigai, NunaMineralsillu misissuineri nersualaarlugit. NunaMineralsip pisortaa Ole Christiansen soorunami aamma nuannaarpoq:

- Vagarimi kuultisiorfitta ineriartortittuarnissaa eqqarsaatigalugu teknikkikkut nalunaarusiaq pingaaruteqarpoq, nalunaarusiarlu arlaannaannulluunniit attuumassuteqanngitsoq pilersaarusiatsinnut tunngavissiilluarpoq, NunaMineralsip pisortaa Ole Christiansen oqarpoq.

Piginneqataassutinillu niuffaffiit nalunaarusiamut atatillugu qisuariaataat isumalluarnarput, NunaMineralsimut piginneqataassutit nalingi 15 procentinik ippassaq qaffakkamik.