Nuna erseqaaq

Imaq, qilak, maqaasineq neriunnerlu, tassa eqqumiitsuliortup Ina Rosingip qalipagaani aqqaneq-marluusuni takutinniarneqarput, taakkulu Nunat Avannarliit Illuanni Københavnimiittumi ullumikkumiit takusarneqarsinnaapput.
Allattoq Knud Reimer
januaarip 12-at 2012 14:15

Naalakkersuisut siulittaasuata ukiortaami ilassinninnera iluatsillugu qalipakkat saqqummersinneqarmata inuppaaluit takoreersimassavaat.

Ina Rosing 46-nik ukioqartoq Nunatsinni alliartorsimavoq, sulilu inuusuttuulluni Danmarkimut nuussimalluni. Kalaallilli Nunaat imaasiallaannaq iperarsinnaanngilaa, eqqumiitsuliaanilu tamanna takuneqarsinnaavoq:

- Isikkivissuaq, issittumilu pinngortitarsuarmut atasutut misigisimaneq maqaasiuartuuakka. Qalipaagaangamami maqaasinera sakkortooq qalipaatilersuininni ersarittaqaaq, tassalu ilisarnaatigisarlugu, Ina Rosing oqarpoq.

Saqqummersitsinerup qulequtaraa Land Ho - qallunaat imaannarsuarmiitillutik nunamik kiisami takugaangamik suaartaatigisartagaat: Land ohøj! eqqarsaatiginerullugu qulequtsiunneqarsimasoq.

Qalipakkat apriilip 17-ata tunganut takuniarneqarsinnaapput.