"Nuna ataatsimoortoq - inuiaat ataatsimoortut" Sisimiut minillugit?

Sisimiut Sulisitsisut peqatigiiffianni siulittaasup Lars Møller-Sørensenip aningaasanut inatsisissatut siunnersuut, Vittus Qujaukitsup uani qaammammi saqqummiunneqartoq, naammaginngilluinnarpaa. Møller-Sørensen naapertussagaanni Naalakkersuisut minivissorsimavaat. Taamaammat ima inernilerpaa, naalakkersuisooqatigiit oqarluartaarutaanni "Nuna ataatsimoortoq - inuiaat ataatsimoortut" Sisimiut Naalakkersuisunit mininneqarsimasoq.
Allattoq Peter Troelsen, Simon Uldum
aggustip 15-at 2013 12:17

Aningaasanut inatsisissatut siunnersuummi sanaartugassanut aningaasaliissutinit tamarmiusunit 739.500.000 kr.-inik aningaasartalinnik Sisimiuni sanaartugassanut 3 mio. kr.-it immikkoortinneqarsimapput. Naatsorsulaaraannilu aningaasaliissutit tamarmiusut 0,4 %-eralugit. Sisimiuni innuttaasut amerlassusaat nunatsinni innuttaasut tamarmiut 10%-iisa missaliorpaat, taamaammat equngasoqarpoq, Lars Møller-Sørensen isumaqarpoq.

-Namminersorlutik Oqartussat Sisimiuni sanaartugassanut aningaasaliissutaata taama appariartiginerat suliffissaqartitsiniarnermut ajortupilussuarmik kinguneqanngitsoornavianngilaq, aammali ilaasortatta ilinniartunik sungiusartitsinissamut allanullu periarfissaannik ajorseriartitsissaaq, sanaartugassaqassanersorli soorunami apeqqutaassaaq, Lars Møller-Sørensen nassuiaavoq.

Sisimiuni aallartinneqarnissaannik utaqqiinnartunik  sanaartugassarpassuaqaraluarpoq. Ilaatigut ineqartut inissiassaat 200-t, paaqqinnittarfiit atuarfiillu nutarneqarnissaat Blok 12-illu isasooriaannaasup taartissaanik sanaartorneq.

Sisimiut Sulisitsisut Peqatigiiffiata Naalakkersuisut ilungersortumik kajumissaarpaat, aningaasanut inatsit ukiormanna kingusinnerusukkut akuersissutigineqalerpat Sisimiut Qeqqatalu Kommunia eqqaamalaaqqullugit-

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq