Nuna 6,3-mik sajuppoq

New Zealandimi illoqarfimmi Christchurch-imi nuna sakkortuumik ippassaq sajummat, inuit ikinnerpaamik 65-it ajunaarput. Annaassiniartunilli oqaatigineqarpoq, ajunaartut amerlanerunissaat ilimagineqartoq.
Allattoq Elisa Isaksen
februaarip 22-at 2011 08:47

Nunap sajunnera nunap sajuttarneranut uuttuut naapertorlugu 6,3-juvoq aamma illunik atortunillu aseruatiteriffioqaluni. Illorsuit portusuuliat uppikaasimapput. Illoqarfiup ilisarnaataa oqaluffitoqaq uppikaasimavoq aamma illoqarfiup ilarujussuani imermik innaallagissamillu pilersuisoqarunnaarluni. Aqqusernit aseruatitersimapput, annaassiniartullu illorsuarni uppikaasimasorpassuarni inunnik annaassiniarlutik ulappullutik.

- Tamanna New Zealandip oqaluttuarisaanerani ajunaarnerit annersarissagunarpaat, nunap sajunneranit aseruatitikkat annertussusaat ippassaq unnukkut paasinarsimmat, ministeriuneq John Key taama oqarpoq.

Christchurch New Zealandimi illoqarfiit annersaata tulleraa, 340.000-inik inulik. Tamaani ippassaq ulloqeqqani inuppassuit ulloqeqqasiuleruttortut meeqqallu atuarnerisa nalaani nuna sajuppoq.

Christchurch nunap sajunneranit kingullermik siorna septembarimi eqqugaavoq, taamanili asuatiternerit annikinneroqalutik.