Nuna 1000 kvadratkilometeriusoq ikuallappoq

Canadami Fort McMurrayimi orpippassuit ikuallannerujussuat Canadap oqaluttuarisaanerani aatsaat taamak annertutigisumik ikuallattoqarfiuvoq.
maajip 07-at 2016 14:28
Nutserisoq Sara K. Jakobsen

Fort McMurrayimi orpippassuit ikuallannerat, Albertap eqqaanit uuliaateqarfimminngaanniit, nunap sinneranut annertuumik siaruaappoq nunalu 1000 kvadratkilometeriusoq, soorlu assersuutigalugu Fynip pingajorarterutaanik annertutigisoq, ikuallalluni.

Canadami kiassuaq anorlerneralu pissutaallutik ikuallannerup siaruatsaaliornissaa ajornakusoortinneqarpoq, tamannalu pissutaalluni nuna aserorneqartoq weekendip ingerlanerinnaani marloriaatinngussasoq ilimagineqarpoq.

Inuit 90.000-iusut qimarnguitinneqarput, taakkunani amerlanerit Albertap kujataanut Edmontonimut Galgarymullu qimaallutik.

Tupinnaannartumillu ajoqusertoqarsimanngilaq inunnillu qimarnguititsineq iluatsilluarsimalluni. 

Canadamiut ikiuukkiartorlutik tikiussorput saniatigullu atortut nassiunneqarlutik, ilaatigut nerisassat, siniffiit, qipiit, aningaasat, qatserisartorpassuillu tikerartinneqarlutik.

Qimaasut tamaasa siniffissarsitinneqarput, atugarisaalli pitsaavallaarnatillu ajorsigaluttuinnarput.

Anoraa saqinnissaa tamanit neriuutigineqarpoq, tamannali piviusunngornissaa ilimagineqanngilaq.