Naalungiarsuup angajoqqaavi Tjekkiamiit nalunaaqutaq ullup qeqqanut timmisartumik aallassapput, najukkaminnullu Sønderborgimut unnulernerani apuutissangatinneqarput.
Syd aamma Sønderjyllandimi Politiit taama ilisimatitsipput.
Naalungiarsuk Thor, ullunik quliinnarnik utoqqaassusilik, Esbjergimi napparsimmavimmiit angajoqqaavisa qimarnguppaat. Ikiaroornartumik atornerluisuunertik pissutigalugu naalungiarsummik pinngitsaaliissummik arsaagaassallutik tusarlerneqaramik qimarngussipput.
Ilaqutariit Tjekkiami ullut 13-it qaangiummata nassaarineqarput. Naalungiarsuk Thor nassaarineqarnermi kinguninngua nakorsamit misissorneqarami ajunngeqisoq paasineqarpoq. Nukappiaraq Sønderborgip Kommunianit angerlaanneqareerpoq, angajoqqaarsiassaanullu tunniuneqareerluni.
Angajoqqaat Sønderborgimi Eqqartuussivimmi inatsit tunngaviusoq naapertorlugu aqagu killisiorneqassapput.