Nukkassaatitorsimaneragaasoq aqagu aalajangiivigineqassaaq

Nukkassaatinik allanillu timimut pissassaatinik atuisarnermik nunatsinni akiuiniaqatigiit suli aalajangiisoqanngitsoq siumut aalajangeereersimagunarput, nukkassaatitorsimaneraagaasup nerrivimmi arsaarartar-tup, Petrus Brønlundip, anisitaanissaa aalajangiivigigamikku.

Kalaallit Nunaanni Nerrivimmi Arsaarartartut Kattuffianni siulittaasoq, Siverth Lynge, tusagassiutinut allappoq, nukkassaatinik allanillu timimut pissassaatinik atuisarnermik akiuiniaqatigiit maajip ulluisa 16-ianni ataatsimiinneranni aalajangiisoqarsimasoq, nerrivimmi arsaarartartoq tusaamasaq, nunatsinni timersornermut attuumassu-taaruttoq ingerlaannaq atuutilersumik.

Apeqqutaaginnalerporlu nukkassaatinik allanillu timimut pissassaatinik atuisarnermik akiuiniaqatigiit misiliutinik aalajangiisartoq siumut nammineq aalajangigassarinngisaminut aalajangeereersimanersoq.

Nukkassaatinik allanillu timimut pissassaatinik atuisarnermik ataatsimiititaliap kisimiilluni nukkassaatitorsimasunik unnerluunneqartut aalajangiivigisinnaavai, timersortartuuneriniit arlaatigut kinguneqartitsinikkut imaluunniit timersortartunut allanut piffissami aalajangersimasumi ilaasussaajunnaarallarlugit mattunneqarallassanersut. Petrus Brønlund qanoq aalajangiivigineqassanersoq maannakkuugallartoq suli ilisimaneqanngilaq.

Nukkassaatinik allanillu timimut pissassaatinik atuisarnermik ataatsimiititaliap suliaq pillugu aqagu nalunaaqutaq aqqanermut ataatsimiilerunik tamanna Timersortartut illuanni Nuummi aatsaat aalajangiivigissavaat.

Nukkassaatinik allanillu timimut pissassaatinik atuisarnermik ataatsimiititaliami ilaasortaapput, siulittaasuuvoq nakorsaq, Birgit Niclasen, eqqartuussisuserisoq, Finn Meinel kiisalu Torkild Grøndahl Olsen, tamarmik Nuummeersut.