Nukkassaatinik atuisutut siumortakkat nunatsinni akuttupput
Nukkassaatinik allanillu timimut pissassaatinik atuisarnermik akiuiniaqatigiit Antidoping Grønland 2002-mi aallartikkamilli inerteqqutaasumik aappassaa ukiormanna siumuipput. Nerrivimmi arsaarartartoq Petrus Brønlund quumigut ikiaroornartup haship akuanik cannabinoide-mik akoqartoq paasineqarpoq. Paasisaq tunngavigalugu maajip ulluisa 23-anni inuttaa peqataatillugu ataatsimiititaliaq "Dopingnævn" ataatsimiissaaq.
Kalaallit Nunaanni Timersoqatigiit Kattuffiat aamma Team Grønland Antidoping Danmark suleqatigalugu ukiumut 25-t missaanniittunik misissuisarput. Team Grønlandip allaffiani ingerlatsisoq Finn Nielsen oqarpoq, aningaasanik atugassaqartitaanerusuugunik misissuisarnitik amerlanerusinnaagaluartut:
-Ingerlalluartorujussuuvugut ukiumut agguaqatigiissullugu immaqa misissuinerit 25-t missaannik ingerlanneqartarput. Nunatsinni aamma nunani allani unammisartut Danmarkimiikkaangata ornitsittarpagut misilitsittarlugillu, Finn Nielsen oqarpoq.
Kikkuuppat?
- Nunanut allanut unammisartut maani nunatsinni nukkissartarfinni sunngiffimmilu assigiinngitsunik timersortartut misileraalluta dopingimut misissortarpagut.
Aaversillugit?
- Quumik misilitsinnerusarpoq. Misiligutit inatsisit maleqqissaarlugit WADA-p – nunat tamat antidopingimut suleqatigiiffiata – akuerisaasumik misiliisarfianut Oslomiittumut nassiunneqartarput, tassanilu misissoqqissaarneqartarlutik sumik akoqarnersut.
Finn Nielsen apereqqipparput pisoq kingulleq nerrivimmi arsaarartartumut tunngasoq pingasunngorpat maajip ulluisa 23-iani inuttaata nassuiaateqarfigisassaa, nunatsinni hashimik
atuisarnermik ersersitsisuunersoq?
- Ukua misiliinerit tigusagut malillugit taama isikkoqanngikkaluarpoq, kisianni immaqa misiliinerit amerlanerusuuppata tigusat amerlanerusinnaagaluarput, kisianni akiuminaalaarpoq, oqaatigiuminaappoq.
Qanormita nalilerneqassava, nukkassaataanngimmammi?
- Una tigusaassutigineqarpoq imatut timersornerup iluani siuarsaatitut allaqqasuutigineqanngilaq, kisianni WADA-p inatsisai malillugit inerteqqutaasutut akuuvoq.
Dopingnævni nalilersuisussaavoq suliaq una qanoq inerneqassanersoq.
Finn Nielsen, Team Grønlandimeersoq taama oqarpoq. Timersortartup quuanik misissuineq ataaseq 3.000 koruuneqartarpoq, misissuisussap angalanera ilanngullugu taamaalilluni Antidoping Grønland aamma Team Grønland aveqatigiillutik ukiumut 200.000 koruunit missaanniittut aningaasartuutigisarpaat. Taakkulu amerlanerusinnaagaluartut, Finn Nielsen isumaqarpoq.
