Nukkassaatinik atuinermik akiuiniat ernumapput

Nukkassaatinik atuinermik akiuiniartut siulittaasuat Birgit Niclasen ima oqarpoq:

- Ernumartuuvoq iisartakkanik nukkassaatitalinnik inerteqqutaasunik atuiniarluni Kalaallit Nunaannut eqqusseriartarneq, issartakkammi taakku kingunerlutsitsisinnaapput. Taamaattumik tamanna pimoorullugu akiorniarparput, Birgit Niclasen oqarpoq.

Taassuma eqqaavaa Nunatsinni nukkassaatinik atuinermik akiuiniartut timigissartarfimmik suleqateqartut, taamaattumillu timigissartarfinni pasitsaassisoqarsimagaangat misissuitsitsoqarsinnaasartoq.

- Iisartakkanik nukkassaatitalinnik atuisimasutut paasisaagaanni utoqqatsissutissanik nassaarniartussaanngilaq, soorlu nalunerarlugu iisartakkat sunik akoqarnersut nalusuusaarlugu. Nukkassaatitalinnik iisartagartorsimagaanni akisussaaffik namminermiippoq. Taassumalu kingunerisaanik pillagaassutigalugu timigissartarfimmut ukiuni marlunni isersinnaajunnaarsitaasarput. Timigissartarfimmi paasisaaffimmiinnaanngitsoq, timigissartarfinnili tamani nukkassaatinik atuiniartunut akiuiniarlutik suleqataasuni, Birgit Niclasen oqarpoq.

Taanna isumaqarpoq ajornartorsiut annertusiartortoq eqqumaffiginiarneqartariaqartorlu.

- Ajornartorsiut annertusiartortoq isumaqarpugut, tamannalu isiginiarparput. Politiit iluatsittumik sulinissaannik kissaappagut, uagullumi aamma namminneerluta suliniaqataaniarpugut. Isumaqarpungalu paasissutissiineq annerusumik ingerlattariaqaripput, ajornartorsiummi qaangissagaanni tamanna pisariaqarpoq, Birgit Niclasen oqarpoq.

Akitsuuserisut misissuinerminni iisartakkat nukkassaatitallinnik ukiormanna qaammatini siullerni marlunni 1000-inik arsaarinnissuteqareersimapput, siorna ukioq ilivitsoq 600-inik arsarinnittoqarsimasoq.

Iisartakkanik nukkassaatitalinnut atatillugu paasissutissat sukumiinerusut nittartakkatigut www.doping.dk-kkut takuniarneqarsinnaapput, soorlu aamma quppersakkat Kalaallit Nunaanni Timersoqatigiiffiit Kattuffiannut saaffiginninikkut pissarsiarineqarsinnaasut.