Nukissiuutit pillugit EU-p ataatsimeersuartitsineranut Nukissiorfiit ilaapput

Silaannaq kissakkiartuinnarpoq, taamaattumillu meerartatta inuusuttullu piujuaannartitsinissaq tunngavigalugu nukissiuutinik atuinissartik ilikkartariaqarpaat. Tamannarpiarlu EU-p nukissiuuteqarneq pillugu januaarip naanerani nunanut tamalaanut ataatsimeersuartitsinerani sammineqarpoq, ataatsimeersuarnermullu nunatsinni Nukissiorfiit sulisuminnik marlunnik peqataatitaqarput. Peqataanermik siunertaa, peqataasup aappaata Inga Dora Gudmundsdottir Markussenip ima nassuiarpaa:

-Ingammik EU-mi attaveqalernissarput anguniarlugu peqataavugut. Tassani meeqqanik nukissiuuteqarneq pillugu ilinniartitsisarneq immikkut soqutigisaralugu.

Nunatsinni meeqqat atuartut nukissiuuteqarneq pillugu paasisitsiniaaffigineqarnissaat Nukissiorfinnit siunniunneqarpoq.

-Nunani allani nukissiuuteqarneq pillugu meeqqanut atuartitsisarnerni misilittakkat paasisaqarfigerusullugit ataatsimeersuarneq ornissimavarput, angusaqarlutalumi.

Nunatsinni erngup nukinga atorlugu nukissiuuteqarsinnaanermut periarfissaqarluarnerput aammali nukissiuutinik atuinermi sipaarsinnaaneq silaannaallu kissakkiartornera ilutigalugu qanoq ililluni mingutsitsinaveersaarsinnaaneq meeqqanut paasisitsiniaanermi ilaatigut sammineqassapput.

Meeqqanut paasisitsiniaanissami Atuarfitsialak Inerisaavillu suleqatiserineqassapput.

Inga Dora Gudmundsdottir Markussen oqarportaaq, nunat tamalaat Bruxellesimi atuarfiat, nukissiuuteqarneq pillugu sammisaqartitsinissaq siunertaralugu, nunatsinni meeqqat atuarfiannik suleqatiginnikkumalluni saaffiginnereersimasoq.

EU-p nukissiuuteqarneq pillugu ataatsimeersuartitsinerani nunatsinnit peqataasut allatigut pissarsiaat unnugu radioavisimi sammeqqissavagut.