Nukissiuuteqarnermut politikkiat nersualaarpaat

Danmarkip nukissiuuteqarnermut politikkia aviisimi The New York Timesimi nersualaarinnittumik imaannaanngitsumik ippassaq sammineqarpoq.
aggustip 11-at 2008 07:58

Politikkikkut naliliisartup sunniuteqarluartup Thomas L. Friedmanip Danmarkip nukissiuuteqarnermut politikkia The New York Timesimut nalilersorpaa, 1973-iminngaanniillu pisimasut aallartiffigalugit USA-p nukissiuuteqarnermut politikkia naakkinartutut nalilerlugu.

Nutaarsiassaqartitsivik Ritzau taama allaaserinnippoq.

- Nukissiuuteqarnermut tunngatillugu Danmarkisut issagaluaratta, Thomas L. Friedman anersaamiitigaluni oqarpoq. Friedmanip allaaserisartagai aviisinut 700-t sinneqartunut naqiterneqartarput.

Danmarkip benziinamut akitsuusersuisarnera CO2-millu aniatitsinermut atatillugu akitsuusersuisarnera allaaserisamini ilaatigut iseqqissaatigai.

Aningaasaqarniarnermut eqquinerlunnanilu suliffissaqartitsiniarnermut eqquinnginnera Friedmanip aamma sammivai.

Thomass L. Friedman Ilulissaneeqqammerpoq, silap pissusaata allanngoriartornerata Kalaallit Nunaannut sunniuteqaatai nammineq isiminik takujumallugit.

Ilisimatusaatigalugulu Sermersuarmi qillerinerit aamma alakkarpai, ilisimatuup Dorthe Dahl-Jensenip Københavnip Universitetianeersut siuttuuffigalugit ilisimatusaatigisai paasiniaavigigamigit.

Silap pissusaata allanngoriartornerata kingunerisai matumani misissuiffigineqarput, Danmarkillu avatangiisinut ministerianit Connie Hedegaardimit qaaqquneqarnermigut Sermersuarmukarluni.

Naalagaaffiit Peqatigiit silap pissusia pillugu ataatsimiittartoqatigiivisa siuttuat Rajendra Pachauri aamma peqataavoq, kingornalu Københavnimut aamma tikeraartoqarluni.

Taamatuttaaq ministeriuneq Anders Fogh Rasmussen anorisaatiliortartullu Vestasikkut pisortaat Ditlev Engel ataatsimeeqatigineqarput.