Nukissiuuteqarnermut ministerip erngup nukinganik nukissiuuteqarfiit takornariarpai
Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko aamma Lars Christian Lilleholt Qorlortorsuarmi erngup nukinganik innaallagissiorfik ippassaq alakkarpaat.
Nukissiuutit aamma silap pisussaa pillugit apeqqutit nukissiuuteqarnermut naalakkersuisut marluk ataatsimiinnerminni oqaluuseraat, Pinngortitamut, Avatangiisinullu Naalakkersuisoqarfik tusagassiuutinut allappoq.
Lars Christian Lilleholtip Kalaallit Nunaannut tikeraarnerani nukissiuutit aamma silap pissusaa qitiutillugit oqaluuserineqarput.
- Kalaallit Nunaanni erngup nukinganik innaallagissiorfiliornissamut periarfissat qanoq annertutiginersut danskit ministeriata takunissaanut periarfissaqarsimavoq, Mala Høy Kúko taama allappoq nangillunilu:
- Pilersuinerup siuarsarneqarnissaanut periarfissat aamma nukissiuutit mingutsitsinngitsut annertunerusumik atorneqarsinnaanerat oqaluuserineqarput.
Silap pissusaata allanngoriartornera naalakkersuisunut ilaasortat naapinnerminni pingaartillugu oqaluuseraat.
Kalaallit Nunaanni ilisimatuussutsikkut misissuinerit arlaqartut Kalaallit Nunaata Danmarkillu ataatsimooruppaat, taakkua siunissami silap pissusaata qanoq ikkumaarneranik ajunnginnerusumik paasineqassapput.
Danskit ministeriata tikeraarneranut atatillugu Kangerluarsunnguami ilisimatuut misissuisarfiat Nuuk Basic alakkarneqarpoq, taanna nunarsuarmi tamarmi silap kissatsikkiartornera pillugu ilisimatuussutsikkut misissuinermi tapersiisoqarsinnaanera aamma Issittumi Inuiaqatigiinnut pinngortitamullu kingunerisinnaasai pineqartillugit Kalaallit Nunaata Danmarkillu suleqatigiissinnaanerannut takussutissaavoq.
