Nukissiuuteqarnermik politikkikkut pilersaarut saqqummiunneqarpoq
Nukissiuuteqarnermik politikkikkut pilersaarut inatsisartuni ataatsimiinnermi Naalakkersuisup Siverth K Heilmann-ip ullumi saqqummiuppaa.
Nunatsinni erngup nukinga atorlugu nukissiorfiliornissani illoqarfiit tullinnguuttut sisamat taaneqarput, erngullu nukissiorfiliassat aningaasanngorlugu 1 milliardit missaannik akeqassapput. Naalakkersuisoq Siverth K. Heilmann pilersaarutit pillugit ima oqarpoq:
- Naalakkersuisut tamakkiisumik saqqummiinerata inatsisartuni tamakkiisumik tapersersorneqarnera nuannaarutigivarput. Tassa massakkuugallartoq Sisimiut, Nuuk, Paamiut Ilulissallu salliutinneqarallarput. Qangali pilersaarutaareersimavoq Sisimiuni erngup nukissiorfiliornissaq, neriuutigaaralu 2009 tikitsinnagu erngup nukinganik nukissiorsinnaalereersimassasoq.
Nuummi Kangerluiarsunnguani peqareersoq, turbiinit pingatsernissaanut koruunit 70 millionit aningaasaliissutigineqarsimapput.
Paamiuni innaallagissiorfiup nutaanngilisimaqisup nutaamik taarsinngiinnarlugu erngup nukinga atorlugu nukissiorfiliornissaq siunniunneqarsimavoq. Aamma Ilulissani ukiorpaalussuarni kissaatigineqarsimavoq erngup nukinga atorlugu nukissiorfeqalernissaq. Taakkua saniatigut pissanganarnerpaanut ilaavoq Maniitsup eqqaani aammalu Kangerlussuup eqqaani alumiiniliorfimmik suliffimmik ukiorpassuarni aningaasarsiutigineqarsinnaasumik pilersitsisinnaaneq. Naalakkersuisuni peqqissaartumik nalilersuinissaq tulleriiaarinissarlu tullinnguuppoq. Aamma qularnanngilaq takusinnaalerumaaripput taaneqanngitsut Qasigiannguakkut allallu aamma erngup nukinganik nukissiorfiliornissamut inissaqaleriasaartut, Siverth K Heilmann oqarpoq.
Nukissiuteqarnermut tunngasunik oqallinnerit isummallu ataatsimiinnermi saqqummersut sukumiinerusumik erseqqinnerusumillu suleriarnissamut pilersaarummik malitseqartinneqarumaartut, Siverth K Heilmann aamma oqarpoq.
