Nukissiuuteqarneq

Pisoqqalli nutaanik taarsersorneqarnissaat akisoorujussuussaaq.

Kissarsuutit maanna pigineqartut misissorluarneqartartuuppata taarsersornissaat amerlanertigut pisariaqassanngikkaluarpoq.

Nukimmik atorluaanerunissaq pillugu Katuami ullumi isumasioqatigiinnermi taama ilaatigut inerniliisoqarpoq.

Kissarsuutit pingasuugaangata marluk pisoqaavallaarput, ukiunik 15-inik sinnerlugilluunniit pisoqaassuseqarlutik.

Kissarsuulli uuliartortoq nutaamik taarserneqarneratigut atuisut ikummatissamut aningaasartuutitik sisamararterummik annikillisinnaagaat, silap pissusaa pillugu qullersaqarfik oqarpoq.

Kissarsuulli nutaamik taarserneqarnera akisoqaaq.

Katuami isumasioqatigiittoqarmat peqataasut eqimattakkuutaanut tallimanut immikkoortiterput, tamarmik immikkut ittumik sammisaqarlutik. Eqimattat ilaata kissarsuutit uuliartortut uuliamillu siunissami pilersuisarnissaq sammivaat, taakkununnga ilaavoq Lars Fredsbo:

- Kissarsuutinik uuliatortunik nutartigassarpassuaqarpoq. Inuppassuit kissarsuutitik misissortissimanngilaat, tamannalu pissutigalugu uuliamik Nunatsinni atuineq annertoqaaq, Lars Fredsbo, Godthåb Oliefyrservicemik piginnittoq oqarpoq.

Kissarsuutit uuliatortut misissorluarneqartarnerat qanoq kinguneqartarnersoq taassuma ilisimalluarpaa.

Kissarsuut uuliartortoq Kapisilinniittoq siorna misissorluareeramiuk kingorna uuliatorpallaarunnaarsippaa. Kissarsuut pineqartoq sapaatip-akunneranut 100 liiterinik atuisarsimagaluarpoq, qaammammut 400 liiterinik atuisaraluarluni. Misissorluareernerup kingorna 150 liiterinik atuisalerpoq, tassa 250 liiterinik sipaarfiulluni.

Tamanna pissutigalugu inuit kissarsuutitik ukiumoortumik misissortittalissagaat Lars Fredsbop kajumissaarutigaa. Namminersorlutik Oqartussat uuliamik atuivallaannginnissaq pillugu paasisitsiniaanissaat aamma kissaatigaa.

Rasmus Sembach Olsen, Namminersorlutik Oqartussaneersoq, eqimattakkuutaanermut peqataavoq. Kissarsuutit uuliartortut pillugit inatsisitigoortumik misissuisoqartalersinnaanissaa taassuma ammaffigaa, qinikkalli tamanna aalajangiiffigisariaqassagaat, taassuma oqaatigaa.